ORANJESTAD – Manera ta conoci, tin gran cantidad di peticion di parti comunidad pa pone verkeersplateau den diferente bario rond di Aruba. E peticionnan aki ta keda aumenta aworaki tambe, considerando e hecho cu ta percurando pa mas y mas camindanan wordo drecha, cual ta haci cu automobilistanan ta aumenta nan velocidad tambe.

Considerando cu un verkeersplateau di klinkers, manera nos conoce, ta costa entre 15 mil pa 17 mil florin pa wordo construi, e ta haci hopi dificil y casi imposibel pa DOW cumpli cu e mas di 300 peticionnan cu tin.

Desde cu minister Otmar Oduber a asumi e responsabilidad di cartera di Infrastructura el a wordo confronta cu e reto aki. A sinta cu DOW pa mustra riba e importancia pa pone verkeersplateu den diferente bario y areanan di scol. Asina desde aña pasa a cuminsa traha riba ideanan nobo y a sondea ehempelnan di diferente otro pais, cual a conduci na e opcion di verkeersplateau di asfalt.

Cu e presupuesto cu DOW tabatin, ta solamente 10 pa 15 di e verkeersplateaunan di klinkers lo por wordo traha pa aña. Aworaki, ta calcula cu entre 40 cu 50 di nan lo por wordo traha pa aña y kisas mas, Oduber a splica. Algo importante segun Oduber ta e aspecto di visibilidad di e plateau pues, tin indicacion di e plateau riba caminda por medio di borchinan cu comunidad ta custuma di wak, pero awor e plateau ta pinta cu strepinan blanco, reflectornan y bliksemflits pinta riba e caminda, cu ta avisa e automobilista cu e ta acercando un verkeersplateau y cu e mester baha velocidad. Tur e aspectonan aki ta contribui na siguridad di e chauffeurnan, y di habitantenan y muchanan den e bario y/ of area di scol cu pone esakinan.

Banda di cu e costo di construccion ta mas abou, e costo di mantencion tambe ta mas abou, como cu ta e liñanan riba e plateau solamente mester wordo pinta of haci limpi pa percura pa nan ta keda visibel. Pa cual ta sondeando tecnologia nobo na e momentonan aki, tambe pa percura cu e color di verf por keda limpi y visibel pa mas tempo.

Desde maart lo ranca sali cu e modelo di verkeersplateau aki, cu prioridad segun inventario di DOW, iniciando cu scolnan. Oduber a duna di conoce cu kier logra cu den e prome 6 lunanan cu tur scolnan por tin verkeersplateau, pa brinda proteccion na muchanan y mayornan, pa despues poco poco bay den diferente bario, mientras cu e trabou di DOW ta sigui den diferente bario rond Aruba.

Marlon Croes, director di DOW, a splica cu en berdad den pasado a haya hopi peticion pa bin cu medidanan pa calma e velocidad di trafico den barionan, y specialmente rond di scolnan, pa cual a cuminsa atende cu e peticionnan aki, pero e gastonan tabata halto. Actualmente a traha dos diferente modelo cu ta diferencia di otro den e hanchura di e plateau. Esun cu normal ta traha ta 4 meter hancho cu su subida y bahada, y e version chikito ta entre 1 meter pa 1.20 meter. Esaki ta duna e departamento espacio pa reduci gasto y traha mas plateau pa yuda e barionan. Cu e modelo di plateau anterior, e duracion di trabou tabata 1 anochi, mientras cu aworaki por traha e plateau grandi di asfalt den mita dia y esun mas chikito den menos cu mita dia.

Pa conclui, Croes a bisa cu pa awo esaki lo ta Aruba su diseño di plateau y si ta necesario por haci ahustacion den futuro.