ORANJESTAD – Nos por a tuma nota den prensa caminda Parlamentario Richard Arends ta trece dilanti, cu durante nan gobernacion, economia di Aruba a crece. Pero Richard ni partido AVP no ta papia di e debe, y nan no kier splica pueblo kico a pasa na aña 2015, cu bo ta mira un crecemento pero cu pueblo no a conoce.
E diferencia ta sinta den e balor agrega cu a keda concentra na WEB. Na october 2014, Eman cu Arends a percura pa subi prijs di awa y coriente cu 14%. Pueblo a hasta manifesta dilanti Parlamento pa esaki. Aña a bolter y den 2015, mundo a conoce prijsnan di bari di petroleo cu a yega te 26 dollar pa bari. Pero e famoso hedging di Richard y De Meza a pone pueblo keda paga 90 dollar pa bari, y no por a gosa di rebaho di prijsnan pa utilidad.
Na WEB si a keda placa, cu awor nos ta wak den e caso di Hoeverts vs Utilities, ta e mesun gang aki a percura pa saca via Utilities pa nan por djodjo cune. A ranca placa pa paga Europe Meets America y Green Conference pa Eman haya cos pa luci, gaba y biaha cune. Mas net Richard, cu awe kier critica esfuersonan di un gobierno drechi, ta mustra di a strica pa su mes via contracto di trabou y di consultancy mas di 2.1 miyon florin. Pues den e periodo tras di lomba, no ta pueblo, pero su propio economia a florece. Mas riba esey si Richard Arends ta keto keto.
