ORANJESTAD – Awe minister Xiomara Ruiz-Maduro lo biaha pa Cuba hunto cu mandatarionan di Corsou y Sint Maarten y Hulanda, pa asina forma parti di e delegacion di Reino Hulandes.
E intencion di e bishita aki ta pa firma un acuerdo internacional pa lanta e Organisacion Caribense di Aduana, Caribbean Customs Organisation (CCO). E CCO aki ta haci e cooperacion y intercambio di informacion mas lihe y eficiente entre e entidadnan di Aduana di e paisnan cu firma e tratado.
Pa Aruba y e otro paisnan den Reino, e acuerdo internacional aki ta masha importante, ya cu e ta haci posibel cu por combati entre otro fraude y e contrabanda di droga mas miho.
E delegacion di Reino lo topa tambe cu vice presidente di e Conseho di Minister di Cuba Ricardo Cabrisas Ruiz pa asina discuti puntonan di importancia.
Tambe Minister Xiomara ta haci uso di e oportunidad pa un reunion bilateral cu e secretario di Estado di Finanzas Menno Snel y un encuentro cu e minister di Cultura di Cuba, Alpidio Bautista Alonso Grau.
