Recientemente Minister Xiomara Maduro a hiba palabra durante e apertura di e seminario ‘The System of Tourism Statistics’ organisa pa Oficina di Estadistica di Aruba (CBS). Durante e seminario tur departamento y instancia cu ta colecta informacion di turismo na Aruba tabata presente pa asina por a mira e resultado di e trabou cu a wordo haci pa CBS asisti pa United Nations World Tourism Organization (UNWTO) pa yega na un Tourism Satellite Account TSA pa Aruba.
Segun un comunicado di gobierno, e mandatario a enfatisa riba e importancia di informacion actual di turismo pa asina por tin un miho bista riba e impacto directo cu turismo tin riba economia di Pais Aruba.
Tourism Satellite Account (TSA).
E ehecutivonan di UNWTO a traha conhuntamente cu e expertonan di CBS pa implementa un TSA pa Pais Aruba. E informacion compila den TSA ta di gran importancia pa nos ya cu e ta contene informacion detaya pa e industria di turismo. E proyecto di TSA pa Aruba ta cuadra cu e vision di Gobierno di Aruba pa promove un maneho basa riba desaroyo sostenibel pa garantisa e bienestar socio economico di e poblacion di Pais Aruba teniendo na cuenta e proteccion y preservacion di nos medio ambiente. E vision aki por wordo realisa solamente si e departamentonan gubernamental, NGO, organisacionnan academico, cada un ciudadano y tambe cada un bishitante cu mester contribui na e compilacion di informacion traha hunto na desaroyo di Pais Aruba.
Presentacion di resultado di TSA.
Durante e seminario sra. Vanessa Satur, Manager Technical Cooperation and Silk Road of the United Nations World Tourism Organization (UNWTO) a presenta e resultadonan di e TSA y otro informacionnan relevante pa e industria di turismo. E informacion cu TSA ta brinda tambe por wordo usa pa haci pronostico economico via e modelo macro economico MARUBA desaroya pa Departamento Economico di Aruba.
