Ayera tardi den un conferencia di prensa di Gobierno di Aruba, minister di Finanzas, Asunto Economico y Cultura, Xiomara Maduro a trece dilanti locual a keda pendiente pa alivio fiscal.

El a splica cu na november di e aña aki a lansa 11 incentivo pa activa economia di pais Aruba y aworaki mester indica e dos incentivo pendiente – cu ta trata di reduccion di tarifa di material di construccion a keda rebaha di 12% pa 10%; y e reduccion di impuesto riba salario y entrada di inkomstenbelasting cu a keda reduci pa 2%.

“Esaki ta incentivonan cu ta bay yuda pa locual ta economia di pais Aruba”, minister Maduro a afirma.

Di loke ta trata material di construccion, el a bisa cu ta un di e actividadnan cu ta lora economia di un pais y pa e motibo aki, door di introduccion di incentivo, ta yuda e ora ey cu un reduccion di 10% pa yuda activa economia di e pais.

Pa locual ta alivio fiscal, minister Maduro a señala cu nan tambe a trece dilanti e reduccion di inkomstenbelasting y loonbelasting, e prome dos tarifa cu lo keda reduci na 2% manera a menciona caba, cu lo nifica cu e peso di impuesto aki ta baha y asina e trahado ta keda cu mas placa den man, segun el a sigura.

“Cu mas placa den man por bin mas consumo y e consumo aki ta locual ta lora economia di e pais”, minister Maduro a expresa.

Tambe el a señala cu ya caba Aruba ta traha locual ta bira e reforma fiscal. Desde 1 di januari 2019 nan a pone e prome paso pa asina por simplifica locual ta bira e parti di impuesto. Di e tempo ey el a menciona cu nan a haci cierto cambionan na e tarifa, e tabelnan prome tabatin 14 tarifa y a reduci esey na 4.

Di igual manera, el a declara cu nan a baha e peso fiscal, caminda cu antes tabata na 54% y aworaki ta na 52%; loke ta cambia pa nan awor ta cu 12% tabata na 14% y loke awor ta 23% tabata prome na 25%, tur ta baha cu 2%.

Tocante ken lo wordo beneficia y con lo beneficia di e cambionan aki, minister Maduro a specifica cu entradanan pa loke ta trata clase media, esnan cu ta bay gana pa aña un suma entre 63.000 te 135.000 florin, e ora ey esakinan lo conoce un rebaho cu ta core entre 1.0.%, te cu 1.4%.

“Tur esnan cu ta gana mas abao y otronan cu ta gana mas halto tambe ta bay haya un alivio, pero esaki ta core den 0.7% y 0.8%. Loke ta nifica cu e reduccion aki ta e clase trahado, principalmente e clase media, ta esun cu ta sali beneficia”, Maduro a comenta.

Desde momento cu a bini cu decisionnan cu mester a tuma pa crisisheffing, y despues tambe otro reformanan na reforma fiscal – cu segun el a afirma, tabata decisionnan necesario pa pais Aruba – e clase media tabata esun cu hopi biaha no por a conta cu locual ta bira reduccion, pero den e caso aki esey si ta conta.

Maduro a expresa cu esaki ta forma parti di un alivio pa pais Aruba cu ta necesario pa reactiva economia di e pais. Manera el a menciona ora Covid-19 a presenta na Aruba cu ceramento di frontera, shelter in place y tur e medida, esey a afecta tur sector como comercio grandemente, pero tambe e trahado cu ta traha eynan.

Na e momento ey, a introduci e alivio fiscal number 1, caminda a presenta e 14 incentivo pa por yuda na e momento ey di emergencia. Despues cu tempo gobierno tambe a bin cu yudansa pa negoshinan chikito y mediano, e sosten financiero pa empresanan aki cu a wordo duna na luna di mei, juli y october, cu den total a brinda 23.8 miyon florin pa nan haya e sosten pa por enfrenta e crisis.

Na luna di mei tambe Gobierno a ofrece subsidio di salario, cu desde e luna di mei te cu december a duna e suma total di 271.7 miyon florin pa cu aña 2020, pa asina por a brinda salario na miles di trahado na pais Aruba den forma di subsidio salario. Maduro a menciona cu esaki sigur a yuda hunto cu e sosten financiero pa empresanan chikito y mediano.

Tambe el a trece dilanti alivio fiscal number dos, cu ta cuminsa dia 1 di januari 2021. Pa incentivo number 1, cu tin di haci cu comerciantenan chikito cu tin benta di 84mil florin pa aña, ta keda liber di BBO, BAZV y BAVP. “Cu esaki mas di 2.000 comerciante chikito manera taxista, esnan cu tin bus, cu tin tiendanan chikito, ta keda beneficia pa e incentivo fiscal aki”, Maduro a sigura.

Di incentivo number dos, el a bisa cu companianan den sector prometedor ta haya un deduccion di 50% di prestamo te cu 30.000 pa aña durante 2020, 2021 y 2022.

Ademas, tin e incentivo number tres, cu tin e deduccion di 200% di gastonan di promocion y mercadeo te cu maximo 30.000 florin. Maduro a expresa cu esaki tabata necesario pa haci negoshinan di un manera nobo pa via di e pandemia aki. Banda di esaki tambe tin e deduccion di 300% di gastonan di formacion profesional pa aña 2020, 2021 y 2022.

Incentivo number 5 ta trata di compensacion di perdida fiscal di aña 2020, 2021 y 2022 te cu 7 aña. Incentivo number 6 ta e maneho suavisa di tarifa di 10% di dividendo pa accionista cu ta biba na Aruba.

Maduro tambe a splica incentivo number 7, cu ta papia di maneho mas amplio di regulacion di fondo di ‘spaar-en voorzieningsfonds’ pa aña 2020 y 2021, cu esaki den situacion di pandemia ta permiti pa por saca e fondonan aki prome cu cuater aña sin cu tin cu paga impuesto.

Di mesun manera, incentivo number 8 ta trece dilanti ‘Investeringsaftrek’ cu ta wordo subi pa 10% y ta conta tambe pa productonan di inversion cumpra den exterior.

Incentivo number 9, el a comenta cu ta trata di anulacion di impuesto riba auto y motorcycle di huur entrante e di cuater kwartaal di aña 2020. Ademas a menciona cu incentivo number 10 ta trata di areglo di pago flexibel pa empresa, particular y pensionado di 60+ cu aworaki nan a ampli’e.

Pa finalisa, Maduro a presenta incentivo number 11, pa por sanea e debenan di impuesto den un solo pago cu un descuento di 30% te cu 30 di juni 2021. Despues di e fecha aki e incentivo aki lo no existi mas.