Durante un conferencia di prensa reciente cu minister di Finanzas, Asuntonan Economico y Cultural, Xiomara Maduro a ofrece, el a papia tocante un alivio necesario cu gobierno lo duna den crisis aki di pandemia COVID-19.

Di Alivio Fiscal 2020, Maduro a splica cu lo bay drenta na vigor e tres luna cu ta cuminsa na april, mei y juni. El a remarca cu gobierno no tin un buffer financiero pa asina den momento di crisis por haya acapara esaki cu yudansa, pa locual ta bira entre otro e comercio. Pero nan a pasa e presupuesto di 2020 y a pidi apoderacion pa e ora ey nan busca e fondonan necesario riba mercado internacional.

Banda di esaki, el a bisa cu tambe ta pa haya ayudo financiero for di reino Hulandes.

Asina mes, el a sigura cu nan tin reunion cu ta tuma luga y hunto cu esey nan a traha un pakete di alivio fiscal cu lo por brinda e tres luna aki. Despues di esey lo evalua atrobe pa wak con ta sigui dilanti.

Un punto di esaki ta cu lo kier facilita pa comercio e cash flow pa asina nan por keda mantene empleadonan y evita mas desempleo. Tambe pa kita of disminui e parti di caida di actividad economico.

Den e pakete di alivio, Maduro a señala cu tambe a pone un parti pa asina hende por cuminsa duna pa esunnan cu anteriormente no a cumpli cu nan obligacion di impuesto, pa nan tambe por haya un oportunidad na e momentonan aki pa drenta den un trayecto di recuperacion y por contribui fiscalmente.

“Ta hopi importante e contribucion di cada un di nos pa asina nos pais por enfrenta e crisis aki”, Maduro a enfatisa.

Esaki ta pa evita desempleo y tambe pa stimula e poder di compra pa por bolbe inverti den comunidad y tambe economia di e pais.

Di e Alivio Fiscal aki, el a menciona cu ta trata di extension di termino pa entrega declaracion y haci pago mensual di impuesto. Esaki ta trata di e belasting cu mester paga tur luna cu ta keda aplasa.

Maduro a bisa cu companianan cu actividad relaciona cu turismo no ta bay paga e contribucion di dunado di trabou pa AOV/AWW bou condicion cu ta mustra un ‘payroll summary’ y ta entrega un declaracion di impuesto riba salario y prima pa seguro social cerca inspector. Esaki ta dirigi pa: Casino, Transporte y Tour Operators, Security, Cafe, Bar y Restaurant, Landscaping, Spa, Car Rental, Agencia di Biahe, Watersports, Carwash, Laundry,Perfumeria, Joyeria, Tienda di Paña, Sapateria, y Souvenirs, Groundhandlers, Uitzendbureau y Compania di Construccion.

Di loke ta trata e declaracion di impuesto riba ganashi di 2019, esaki tambe ta bay wordo prolonga e fecha y lo nifica cu te na november personanan por entrega esey. Esaki tin un excepcion pa institutonan financiero grandi cu tin un poder financiero y cu semper ta cumpli cu e parti aki.

Tambe tin un extension di pago pa acuerdo di pago, loke ta nifica cu tur hende cu tin un acuerdo di pago na e momentonan aki pa e proximo tres luna ta wordo extendi.

Di mesun manera, no lo cobra boet pa incumplimento of tardansa den cumplimento cu entrega di declaracion mensual, total of parcial.

Ademas, tampoco lo cobra interes riba debenan habri. Asina tambe lo haya areglo di pago flexibel cu ta 24 luna pa contribuyente individual cu minimo 100 florin, 24 luna pa entidad empresarial cu minimo 500 florin y 36 luna pa pensionado cu minimo di 75 florin.

Pa locual ta pago di debenan bieu, tur cobransa cu tin fecha desde 31 di december di 2010 lo haya 75% di descuento, si e fecha ta desde 1 di januari te cu 31 december di 2014 lo haya 50%, desde 1 di januari 2015 te cu 31 december di 2016 lo haya 30% di descuento y pa esunnan cu tin fecha di 1 di januari te cu 31 december di 2019 lo haya 10% di descuento.

Lo suavisa e maneho e cuanto reduccion di tarifa riba pago di dividendo, esunnan cu tin nan placa afo y lo kier trece akinan lo por declara cu 10% en bes di 25%.

Di loke ta trata stipulacion pa cu repentimento (Inkeerbepaling) esaki ta conta pa esunnan cu no tabata cumpliendo cu impuesto y por drecha nan belasting, ademas a keda aplasa e proceso di cobramento forsa (beslag), e persona lo haya notificacion di esaki pero departamento di Impuesto no lo actua pa ehecuta e decision.

Pa finalisa, el a menciona cu esaki tambe ta aplica pa loke ta trata control di buki cu lo keda aplasa den tres luna aki y nan lo bay mehora e servicio pa declaracion y pago online.