Siman pasa Minister Xiomara Maduro a pidi departamentonan di Gobierno hunto cu gremio comercial ATIA, AHATA y Camara di Comercio pa sinta hunto y yega na un proposicion di yudansa di urgencia pa yuda negoshinan chikito y mediano den e proximo lunanan.
Diabierna e comision a logra yega hunto na e rekisitonan aplicabel, pero ainda tin algun punto cu mester keda resolvi pa asina por brinda alivio. Entre nan, tin e necesidad pa adapta e Alivio Fiscal presenta na e situacion di Shelter In Place cu ta trece mas negoshi cu solamente esnan cu ta afecta directamente door di e caida di actividad den turismo.
Importante ta cu Gobierno ta purba pa hunto cu gremio comercial yega na un yudansa pa e negoshi chikito y mediano cu awor aki ta forma mas di 90% di comercio.
Banda di esaki Aruba ta pendiente ainda den ki forma Reino Hulandes lo brinda yudansa conforme articulo 36 di Statuut, ya cu riba nos mes Aruba awor aki no tin un buffer financiero pa por brinda e yudansa cu comercio kier conta cune. E suma di e yudansa y hasta e forma cu Gobierno di Aruba lo por brinda yudansa na comercio na e momentonan aki ta depende di e yudansa di Reino. Gobierno ta sigui busca solucion pa e retonan cu Covid19 ta trece cune.
