Pa aña 2021 lo sigui investigacion di accountant pa controla si a cumpli cu e condicion di recorte
Un di e condicionnan pa Aruba por haya sosten di likides den forma di prestamo di Hulanda, ta pa companianan estatal tambe ta solidario na interes general y haci un recorte den salario y beneficio na analogia di e recorte di 12,6% den sector publico.
E recorte pa companianan estatal a tuma lugar den salario y beneficio di e directornan, trahadornan y hunta di supervision, di respectivamente 20%, 12,6% y 20%.
Control di accountant
Pa controla cu e recorte aki a tuma lugar, Minister di Finansa a pidi cada compania estatal pa duna un bista di e recorte aplica y raporta esaki apart den nan cuenta anual.
Como cu hopi compania tin un retraso den trahamento y/of control di nan cuenta anual pa aña 2020, Minister di Finansa a yega na e palabracion cu e Asociacion di Accountant di Aruba cu un accountant lo traha un raportahe apart, un ‘Agreed-Upon Procedures,’ cu ta duna un bista si e compania a cumpli of no cu e recorte di 12,6%.
E raportahe aki a wordo traha y riba 30 di augustus 2021, 22 compania estatal a raporta na Minister di Finansa riba e recorte. Di e 22 companianan estatal, ta na Serlimar so no a tuma lugar ainda e investigacion door di un accountant, debi cu Serlimar door di su situacion financiero precario y e estado di ‘surseance di betaling’ no por permiti su mes e extra gasto pa un accountant haci e raportahe necesario.
Contribucion na Fondo di FASE
Banda di demostra solidaridad y pa por cumpli cu e condicion pa haya sosten di likides di Hulanda na interes general di Aruba, Gobierno a pidi e companianan estatal pa pasa e fondonan acumula di e recorte pa un cuenta apart di Gobierno na Banco Central pa asina cubri gastonan di FASE. E investigacion di accountant tambe a raporta riba e contribucion aki.
Di e 22 companianan estatal, 8 compania a stort e fondo di recorte den e cuenta special di FASE.
E otro 14 companianan cu no a manda e recorte, mester a presenta un ‘liquiditeitsoverzicht’ di aña 2020 den cual mester comproba cu nan tabata financieremente mal para y na bienestar di e compania no por a cumpli na manda e recorte pa e fondo special di FASE. Esnan cu por y no a cumpli, lo wordo exigi pa cumpli.
Consehonan CAFT
Dia 24 di november CAFT a pidi Gobierno pa recorda e companianan estatal pa nan manda e placa di e recorte pa caha di Gobierno. Mas reciente, dia 29 di november CAFT ta pidi pa mantene e recorte den sector (semi) publico te ora cu Conseho di Minister di Reino dicidi otro.
Recorte den aña 2021
Informacion riba e recorte den companinan estatal den aña 2021, lo sigui asina cu e cuentanan anual ta cla of asina cu e informacion necesario di e companianan estatal ta disponibel pa e investigacion di accountant por tuma lugar.
