Danki na nan esfuerso por a brinda 422.8 miyon florin na Subsidio di Salario y 44.7 miyon florin na Sosten Financiero pa kwartaal.

Durante e reunion publico den Parlamento pa legalisa e sosten financiero den forma di Subsidio di Salario, Minister Maduro a tuma un rato pa gradici tur comision cu a traha incansablemente pa asina Gobierno por a brinda sosten financiero na comercio den forma di Subsidio di Salario y Sosten Financiero pa kwartaal.

Comision Comercio

E mandatario ta gradici e ‘Comision Comercio’ cu a consisti di ATIA, AHATA, Camara di Comercio, SVB, Departamento di Estadistica, Departamento di Finansa, Departamento di Impuesto, Departamento Economico, Bureau Rampenbestrijding Aruba y representante di Ministerio di Labor. E comision aki a traha riba e Sosten Financiero cu a wordo duna na comercio den forma di e 4000 florin pa kwartaal na empresa chikito y mediano y a traha tambe riba e condicionnan pa otorga e Subsidio di Salario pa comercio por a mantene cupo di empleo.

Comision Decreto Ministerial

Minister Maduro ta gradici tambe e comision cu a traha riba e Decreto Ministerial cu ta contene e reglanan pa por brinda e sosten financiero pa kwartaal y tambe e subsidio di salario na e companianan. E Subsidio di Salario a conta cu 3 Decreto Ministerial ya cu na 3 ocasion mester a adapta e reglanan. E comision aki a consisti di SVB, Departamento di Estadistica, Departamento di Finansa, Departamento di Impuesto, Departamento Economico y Departamento di Legislacion.

Toetsingscommissie/bezwaarcommissie 

Palabra di gratitid tambe ta bay pa e ‘Toetsingscommissie’ cu a consisti di SVB, Departamento di Impuesto y Departamento Economico. E comision aki a keda encarga pa trata e obhecionnan haci (bezwaren) riba otorgacion di Subsidio di Salario y Sosten Financiero pa kwartaal.

Un total di 467.5 miyon florin na sosten financiero duna na comercio

Danki na e efsuerso grandi di tur empleado publico y demas persona cu a forma parti di e comisionnan aki, Gobierno por a brinda un total di 422.8 miyon florin na Subsidio di Salario y un total di 44.7 miyon florin na Sosten Financiero pa kwartaal den 2020 y 2021. Pues un total di 467.5 miyon florin a wordo duna na comercio pa por surpasa e crisis.

Minister Xiomara Maduro ta gradici tur instancia y persona cu a haci un esfuerso grandi pa Aruba por a enfrenta y surpasa e pandemia. E mandatario ta gradici specialmente SVB pa nan eficiencia, esfuerso grandi y bon cooperacion cu a haci cu e administracion y e pagonan di e

sosten financiero por a bay na un manera eficaz. Danki na e trabou haci pa tur e instancianan aki, hopi mama y tata por a conserva nan cupo di trabou y entrada durante e crisis di mas grandi cu nos Pais a yega di conoce.