Pa ricibi e yudansa financiero for di Hulanda, Aruba mester cumpli cu algun condicion cu ta poni den e landspakket cu a keda acorda cu Hulanda dia 13 di november 2020. Dia 1 di februari 2021 e agenda di e trabounan necesario pa por cumpli cu e condicionnan pa e prome kwartaal di 2021 a bira conoci.
Pa locual ta e agenda di ehecucion cu ta trata finansa y economia, Minister Maduro ta informa den un comunicado di prensa cu tin 7 accion tumando lugar pa asina por cumpli cu e deadline di 1 di maart. Ta trata di puntonan riba e tema di A. Maneho financiero, C. Impuesto, D. Sector financiero y E. Reforma economico.
Maneho financiero
Den cuadro di fortalese e control financiero na nos Pais door di Colegionan Halto di Estado, Minister Maduro ta informa cu Departamento di Finansa ta trahando un lista di e leynan cu ta necesario pa reforsa e control financiero cu tin prioridad pa keda introduci. Banda di esaki Departamento di Finansa ta trahando tambe riba un ‘gap-analyse’ pa saca afo con pa mehora e proceso di control financiero actual. Ta trata aki di puntonan A1.1 y A1.2 di e Landspakket.
Impuesto
Riba e tereno fiscal, Departamento di Impuesto DIMP ta trahando pa presenta un plan pa investiga cual sistema di impuesto indirecto lo surti Aruba. Banda di esaki DIMP ta trahando tambe riba un plan con pa mehora e organisacion pa asina por yega na cobransa mas optimal di impuesto. Riba nivel di ambtenaar, DIMP a yega na un entendimento cu otro partners den Reino pa asina Aruba por sera un Acuerdo di Impuesto hunto cu Hulanda, Corsou y Sint Maarten y asina evita evasion di impuesto den Reino. Ta trata aki di puntonan C1.1, C3, C4 y C5 di e Landspakket.
Sector financiero
Debi cu e integridad di Aruba su sistema financiero ta wordo evalua e aña aki pa Caribbean Financial Action Task Force CFATF, Departamento di Legislacion ta bay presenta un agenda detaya di e proceduranan y e leynan cu mester keda adapta pa Aruba por pasa e evaluacion aki exitosamente. Ta trata aki di punto D4.1 di e Landspakket.
Reforma economico
E yudansa humanitario cu ta wordo brinda door di Hulanda via Rode Kruis ta bay stop dia 1 di juli 2021. For di e momento ey Gobierno di Aruba mes mester bay organisa y paga pa e yudansa aki. Bureau Rampenbestrijding y Departamento di Asunto Social ta trahando un plan con pa atende cu e necesidad aki. Ta trata aki di punto E4.1 di e Landspakket.
Lo brinda mas informacion segun deadline
Minister Maduro ta enfatisa cu na e momentonan aki hopi trabou ta tumando lugar na diferente departamento di Gobierno pa asina por yega na e informacion y plannan necesario pa por ehecuta e puntonan di e Landspakket. Lo purba mas cu por pa keda informa riba e ehecucion di e agenda basa riba e deadlinenan cu a keda acorda. E proximo deadline cu ta concerni e temanan di finansa y economia pa e prome kwartaal ta 15 di maart pa un plan pa reduci ‘red tape,’ 16 di maart pa presenta un plan con DIMP, notarionan, svb y fondo di pensioen por haya informacion bancario, 15 di april pa presenta un plan pa scrutina subsidio y pa presenta un plan con pa haci e compra di servicio y producto door di Gobierno mas eficiente y eficaz. Na april of mei ta spera di haya e rapport di IMF su ‘quick scan’ di e sector financiero y e control riba e sector aki na Aruba cu ta wordo haci na e momentonan aki via IMF su ‘Article IV mission.’
