Minister xiomara maduro ta anuncia dos incentiva mas pa completa e pakete di alivio fiscal 2 pa reactiva economia di Aruba

Desde 1 di januari 2021 ta reduci tarifa di impuesto pa importacion di material di construccion

y ta reduci tarifa di impuesto riba salario y entrada

Pa por enfrenta e efectonan di COVID19 Minister Maduro a anuncia na april e pakete di Alivio Fiscal 1 y na november ultimo a anuncia e pakete di Alivio Fiscal 2 cu ta consisti di 11 incentiva cu ta trece alivio na comercio y pueblo en general y ta reactiva economia di Pais Aruba. Na november Minister Maduro a indica cu tabata falta algun calculo ainda pa por anuncia dos incentiva mas, esta reduccion di impuesto riba importacion di material di construccion y rebaho di tarifa di impuesto riba salario y entrada. Tur trabou a keda finalisa y den un conferencia di prensa promer cu aña caba Minister Maduro a anuncia cu e pakete di Alivio Fiscal 2 awor ta conta cu 13 incentiva pa reactiva economia di Aruba. Desde 1 di januari 2021 ta reduci tarifa di impuesto pa importacion di material di construccion y ta reduci tarifa di impuesto riba salario y entrada.

Reduccion di tarifa di impuesto riba importacion di material di construccion

Construccion ta un actividad importante cu ta aporta na economia di un pais. Pa e motibo aki e mandatario a anuncia incentiva number 12 den e pakete di Alivio Fiscal cual ta un reduccion di impuesto riba material di construccion di 12% pa 10%. Minister Maduro ta informa cu recientemente a firma e decreto gubernamental pa haci posibel cu desde 1 di januari 2021 e impuesto aki por conoce un reduccion di 12% pa 10%. E decreto gubernamental awor ta canando su caminda legislativo y lo tin forza retroactivo te cu 1 di januari 2021.

Reduccion di tarifa di impuesto di salario y entrada

Minister Maduro a anuncia tambe incentiva number 13 cu ta e rebaho di impuesto riba salario (loonbelasting) y entrada (inkomstenbelasting) pa e prome dos tarifanan cu ta keda reduci cu 2%. Cu e reduccion aki tur trahado lo haya un alivio, pero principalmente e clase media cu un salario entre AWG 63.792 cu AWG 135.540 pa aña lo sali mas beneficia. E mandatario ta subraya cu e clase media ta esun cu semper ta absorba e subidanan y cu e incentiva aki kier yuda trece un alivio pa nan por keda cu mas placa den man. Cu e incentiva aki kier logra yuda e poder di compra pa asina por reactiva economia di Aruba. E decreto ministerial cu ta contene e tarifanan nobo di impuesto riba salario entrada ta publica bou number AB 2020, nr 207.

Gradicimento

Minister Maduro ta gradici e profesionalnan na Departamento di Impuesto, Departamento di Legislacion, Oficina Estadistica di Aruba y Departamento di Finansa, kendenan a traha hopi duro durante e ultimo dianan di aña 2020 pa por a logra keda cla cu e dos incentivanan prome cu e aña caba. Minister Maduro kier recorda cu ta nos tur mester yuda y traha hunto pa nos por surpasa e crisis aki. Ta nos forsa di coherencia ta nos fortalesa pa reactiva economia di Pais Aruba.