Recientemente minister Xiomara Maduro a haya e noticia cu e compania di rating internacional Fitch a baha credit rating (grado di credibilidad financiero) di Aruba cu dos grado y cu un prospecto negativo. Esaki ta debi na e consecuencia di COVID-19 pa Aruba.
Despues cu na april 2019 Aruba a logra mantene su ‘investment grade rating’ na BBB-, un aña despues Fitch a ‘downgrade’ Pais Aruba cu dos notch down na BB-, cu ta nifica cu Pais Aruba ta perde su credibilidad financiero.
Fitch ta relata cu e bahada aki ta refleha un caida fuerte riba economia di Aruba debi na e perdida riba e entrada di turismo den añanan 2020 y 2021 y tambe e deterioro di e cuentanan fiscal y entrada internacional. Alabes Fitch ta proyecta cu e Debe/GDP lo subi na 92.6% en comparacion cu 62.8% na aña 2019. Tur esakinan a causa e bahada den e ‘investment grade rating’ di Pais Aruba como consecuencia di e pandemia mundial di COVID-19.
E mandatario ta enfatisa cu apesar di tur e desafionan financiero y economico grandi cu e pandemia mundial di coronavirus sin precedencia a trece pa Aruba, Gobierno ta trahando cu un actitud positivo pa por logra surpasa e momento dificil aki. Pais Aruba por conta cu un Gobierno cu ta sigui traha duro pa Aruba, hunto cu e forsa di coherencia di nos hendenan y cu fe den Todopoderoso Aruba por recobra un ‘investment grade rating’ satisfactorio y credibilidad financiero bek. Por lesa e rapport di Fitch riba https://www.fitchratings.com/research/sovereigns/fitch-downgrades-aruba-ratings-to-bb-outlook-negative-08-04-2020
