Minister di Finanzas, Asuntonan Economico y Cultura, Xiomara Maduro durante un conferencia di prensa a trece dilanti e topico di productonan cu lo tin prijs maximo temporal y a duna e mensahe pa comunidad keda trankil y no drenta den panico.

Maduro a informa cu nan ta haci lo corecto pa comunidad por haya e productonan necesario den e momento aki di crisis. El a menciona cu tin un canasta di productonan y cu henter mundo ta enfrentando retonan na e momentonan aki cu e virus COVID-19.

Maduro a señala cu e decision lo drenta na vigor awe dia 20 di maart y a wordo tuma pa e parti di productonan di higiena, cu temporalmente ta bay ta regula. Esaki ta nifica cu ta bay pone un margen riba cual e productonan por wordo bendi, pa asina evita y purba contene riesgo di keda afecta pa COVID-19.

E productonan ta desinfectante pa uso personal como hand sanitizer, alcohol 70%, glacial y habon, pa productonan di uso domestico ta cloro, Lysol y tambe wipes, bebidanan cu ta contene electrolyten, papel di WC, ekipo di proteccion manera mondmask y glovenan, bruki pa baby, frutanan seco, baby wipes, cereal como corn flakes plain, frozen fruits, frozen chicken whole legs y chicken wings.

Di mesun manera, el a manifesta cu nan a sinta cu e comerciantenan mayorista di Aruba pa asina por repasa e lista aki, pero tambe pa indica pakico nan a tuma e decision, debi na e necesidad y na e hecho cu esaki lo ta temporal y no lo forma parti di e canasta basico. Pero si lo wordo regula pa motibo cu tur hende mester di esaki pa higiena y pa contene e contagio cu e virus.

Di e reunion ey, Maduro a bisa cu tabatin asistencia di e 98% di mayoristanan di Aruba. Durante e reunion nan a yega na un bon entendimento pa loke ta e margen cu lo pone ariba e productonan aki, pa asina nan por ta accesibel, na un prijs economico.

El a reitera cu esaki no ta un medida pa aumenta prijs pa pueblo, pa via cu el a mira riba red social Facebook cu hendenan ta bisa cu el a aumenta prijs pa productonan. Tocante esaki el a comenta cu el a bin cu un prijs maximo pasobra el a wak kico a pasa na momento cu e noticia di e virus a yega Aruba y hopi hende a bay cumpra den cantidad grandi; supermercado tabata yen di hende y p’esey el a duna e mensahe pa hende keda trankilo.

“Tin suficiente producto pa por abastece e demanda local”, Maduro a sigura. El a informa cu na e momentonan aki no ta e caso cu cierto producto lo ta ‘out of stock’.

El a insisti hende no mester cumpra di mas, mester corda riba esunnan cu ta mas vulnerabel den comunidad y no crea un escasez pa e isla.

Tambe, el a bisa cu el a papia cu e mayoristanan tocante e ampliacion di canasta basico, cu pa un tempo largo tabatin 11 producto y cu a haci algun cambio. A amplia e canasta basico cu mas producto y den e prome fase cu a bay na vigor desde februari, tur productonan frozen a bin aden y tin algun producto di e otro fase cu ta spaghetti, pasta, papa havermount, hariña, lechi likido duradero den tetrapak of boter, cu na e momentonan nan ta drenta den e canasta basico y lo anuncia esey despues.Esey ta e canasta basico. Banda di dje temporalmente gobierno ta pone lista di e diesun producto di e parti di higiena y cuminda basico, cu lo wordo regula na e a tres luna y despues nan lo bolbeevalua cu a mayoristanan pa wak si lo wordo amplia of lo sigui cune.