Minister Xiomara Maduro na sindicatonan: ‘E pensioen di nos Grandinan tambe ta core peliger’

E siman aki, Gobierno a reuni cu sindicatonan caminda pa duna nan, entre otro, un presentacion di e situacion financiero di Pais Aruba y brinda informacion di e sosten financiero cu Gobierno ta duna pa surpasa e crisis economico y financiero causa pa e crisis di COVID19.

Maduro a splica cu e cifranan aki ta e base y e realidad den cual e decisionnan ta wordo tuma na bienestar di Aruba y su hendenan.

Segun un comunicado di prensa, entrada di Gobierno ta cay cada luna mas atras. A premira cu Gobierno lo perde 50% na entrada e aña aki, pero realidad ta mustra nos cu ya na mei 2020 cana nos a bay mas atras cu 50% na entrada. Prima di AZV y SVB tambe ta cay atras y ya caba na e momentonan aki SVB ta usando 11 miyon di nan reserva di 3 luna cu tin cu sigura cu nos Grandinan tin entrada.

E mandatario a subraya cu esakinan ta e cifranan real di Pais Aruba, pues no ta trata di cifra manipula, sino e simpel realidad a base di cual decisionnan mester wordo tuma pa nos pais no bay perdi, e comunicado ta specifica.

Na final Maduro a duna un relato tambe di e sosten financiero brinda pa Gobierno a base di entrega di salario di, entre otro, e empleado publico. Di e manera aki e sindicatonan por ta bon informa di e realidad financiero den cual Gobierno di Aruba y su persona como Minister di Finanzas mester tuma decision pa Aruba por surpasa e crisis di COVID19.

Ademas, Maduro a informa nan cu Gobierno ta trahando pa percura pa nos sistema di seguridad social no kibra a consecuencia di e crisis economico financiero fomenta pa COVID19. E mandatario a mustra a base di cifranan compila pa Departamento di Impuesto pa luna di mei 2020, cu na e momentonan aki tur entrada di prima ta cayendo atras den forma acelera. Esaki ta trece cune cu ya di luna pasa SVB a cuminsa haci uso di su reserva di 3 luna.

Maduro a splica cu normalmente SVB ta ricibi 24 miyon na prima pa luna. Den luna di april a ricibi 20 miyon y na mei a ricibi 17 miyon. Pues ya caba SVB mester a recuri na 11 miyon di nan reserva pa por completa e 24 miyon necesario. Si entrada di prima sigui baha asina, SVB su fondo pa cual ta brinda seguridad di entrada di pensioen na nos grandinan ta drenta peliger.

Maduro a pone enfasis pa splica e sindicatonan cu esaki ta e realidad financiero den cual Gobierno y e Minister di Finansa mester tuma decicion. E realidad aki ta exigi toma di decision rapido y eficaz, y no ta brinda espacio pa negosha of pa bay haci weganan politico. Ta pensioen di nos Grandinan lamentablemente ta core un peliger real y nos mester atende esaki na un manera serio.