Minister di Finansa y Asunto Economico, Xiomara Maduro a usa e frase na Hulandes: ‘Keulen en Aken zijn niet in één gebouwd,’ pa reacciona riba CAFT su carta ultimo di siman pasa tocante cuenta anual, unda e colegio di supervision financiero ta kere cu mester bin mehoracion den e calidad di e reportahenan di ehecucion.
E mandatario añadi cu CAFT sa cu Gobierno ta atende seriamente cu e maneho financiero di Aruba y cu tin asuntonan cu no por drecha di mainta pa anochi. “Pues CAFT no por pretende cu nos por drecha tur cos di biaha. Dios mes a tuma shete dia pa traha mundo,” asina el a laga sa na e matutino aki.
Bon Dia Aruba a puntra e mandatario si a base di e contesta aki nos por interpreta cu dificilmente Gobierno por cumpli cu full e recomendacion di CAFT pa e delaster reportahe? Segun minister Maduro, gobierno ta trahando riba e mehoracion nan necesario. Nan no ta cosnan cu di awe pa mañan por keda cla. Pues CAFT lo bay keda menciona nan por lo pronto. Tambe el a referi na un articulo reciente, caminda e ta splica riba e ‘nulmeting’ y riba e certificacion di e cifranan cu ta indica cuanto tempo esaki ta bay tuma.
Den e articulo menciona e mandatario a splica Parlamento kico ta wordo haci pa yega na un ‘goedgekeurde accountantsverklaring’ pa certifica e cifranan di Cuenta Anual di Pais Aruba. Un biaha e ta referi den dje cu tin un caminda largo ainda pa cana pa realisa e certificacion necesario.
E mandatario a expresa cu e no ta un secreto cu e cifranan di Pais Aruba ainda no ta conta cu un certificacion den forma di un ‘goedgekeurde accountantsverklaring.’ Esaki ta un preocupacion cu Contraloria General tin añanan ta señala y recientemente CAFT tambe a vocifera su preocupacion pa esaki.
Segun e mandatario, gabinete Wever-Croes na su entrada den gobernacion a atende cu e preocupacion aki, y tambe nan a yega na palabracion cu CAFT pa traha na un manera serio pa por identifica den un ‘nulmeting.’ E ta haya tambe cu esaki ta e puntonan cu mester mehoracion y indica con por bay mehora e procesonan administrativo necesario pa por yega na un miho control di e cifranan di Pais Aruba.
Minister Maduro a informa cu e ‘nulmeting’ ta wordo haci awor pa Centrale Accountantsdienst (CAD). Pareu cu esaki SOAB di Corsou tambe ta yudando CAD pa por yega na e proceso necesario cu e meta pa duna un declaracion special riba e cifranan di aña 2020.
Minister Maduro a splica Parlamento cu pa yega na un ‘goedgekeurde accountantsverklaring’ lo dura algun aña. E resultado di e ‘nulmeting’ lo mester wordo ehecuta prome. Pues drecha tur locual mester wordo drecha na diferente departamento, pa despues e accountant por certifica e cifranan presenta den e Cuenta Anual.
Ta premira cu e declaracion special riba e cifranan di aña 2020 por ta cla den aña 2021 y den aña 2022 lo bay tin un declaracion special pa e cifranan di aña 2021. Pa awor aki e trabounan lo mester sigui pa asina kizas na aña 2023 Pais Aruba por conta cu un ‘goedgekeurde accountantsverkalring.’
