Hustamente prome cu e mandatario encarga cu economia y finanzas, Xiomara Ruiz-Maduro mester a bay sinta cu FitchRatings, a reacciona entre otro riba un press release di AHATA unda ta indica cu Aruba ta den un ‘perfect storm’ financiero y economico. AHATA a critica cu gobierno por medio di introduci un Ministeriële Regeling lo por exigi entrada di ATA Sui Generis, mientras AHATA ta haya esaki inhusto. E mandatario ta reacciona bisando cu no ta pa nada e institutonan manera ATA ta haya fondo publico y tin cu contribui ora cos ta menos bon.
Den nan press release, e gremio di sector hotelero, AHATA, ta bin dilanti bisando cu actualmente Aruba ta den un ‘perfect storm’ cu lo test e economia di e pais. Esaki mirando entre otro e situacion cu e malesa Covid-19, e malesa causa pa infeccion cu e coronavirus. Netamente aworaki tambe lo bay trata e presupuesto pa aña 2020 tambe, y esaki ta crea un clima intenso di discusion rondona cu con gobierno di Aruba ta gasta su fondonan disponibel.
Ruiz-Maduro den su discurso a defende gobierno su posicion creando un analogia como cu Aruba aworaki ta nabegando den un tormenta. E mandatario a bisa: “Nos no a sali di e zona di peliger, y ora bo ta memey di un coronavirus y bo ta memey di un evaluacion, y bo tin algo poni cu ta bay afecta bo como pais, e ta bira un momento hopi fastioso pa bo como pais, y p’esey e ora ey ta importante pa hiba un debate sano. Pasobra nos ta papia di consecuencia pa nos economia. Awe ami ta akinan. Mañan por tin otro minister, por tin otro gobierno, pero loke mi ta señala (red: pago di debe riba proyectonan PPP) no lo bay.”
Loke e minister ta trece dilanti, den poco palabra, ta cu no por bay complace tur grupo alabes; esta pueblo, comercio, institutonan manera FitchRatings y Hulanda. E mandatario ta indica cu pa via di e debe redobla, crea pa proyectonan manera Watty Vos Boulevard, Aruba ta keda ‘sin buffer’ pa por lidia cu problemanan. E unico manera cu por baha e debe, ta si gobierno mantene un surplus den su presupuesto. Ruiz: “Nos no ta haciendo e trabou aki pa haya placa di prenchi di Hulanda of di CAft, nos ta haciendo esaki pasobra manera mi a mustra, nos ta e boto eynan memey di e perfect storm”.
Fin di luna ta bin rating nobo di Fitch cu por tin consecuencia pa pago di Watty Vos Boulevard
E minister femenino a reacciona riba critica cu gobierno lo bay kibra economia sea cu reforma fiscal, of cu e accionnan tuma pa purba paga interes y debe cu tin pendiente. Pa esey, el a indica cu tin un ‘financieringsbehoefte’, esta un necesidad di financiamiento na un cantidad di 315 miyon florin, cual ora ta kita esaki di e debe cu mester paga aworaki di 361 miyon, ta resulta den e surplus di 46 miyon florin. Asina Ruiz-Maduro ta splica cu e ‘tribon’ aki ta ‘come’ e ‘buffer’ cu normalmente lo tin.
Ademas, e ta indica cu: “Economia lo a kibra na 2017 caba si no a cambia direccion di finanzas publico. Na e momento ey no tabata pagando AZV, SVB y APFA. Cu esey a bin un domino effect, cu si awe nos no a tuma responsabilidad, economia lo tabata kibra caba”.
Loke ta enfocando riba dje actualmente ta pa yega na un rating faborabel cerca Fitch. Ruiz-Maduro ta splica cu esaki lo tin consecuencia positivo dobel pa Aruba. Si logra haya un rating faborabel, credibilidad financiero den Aruba riba mercado internacional ta hisa y asina aki gobierno por fia placa riba interes mas faborabel, cual na su turno lo por haci e peso di paga e debenan cu tin habri uno mas suave. Banda di esaki, si Fitch bin cu un rating menos faborabel pa Aruba, aworaki gobierno a bin haya sa via rapport di Controlaria General (Algemene Rekenkamer), cual a haci un investigacion riba proyectonan PPP titula Bo Aruba, cu den contract di Watty Vos Boulevard tin un clausula unda ta indica cu si Aruba su credibilidad financiero (rating) baha, e financiado di e proyecto lo por bay cobra gobierno e suma cu debe di manera mas acelera di loke ta stipula den e contract.
