Dia 28 di juni ultimo Minister di Finanzas Maduro a manda contesta CAFT riba su recomendacion y preocupacion cu e organo di supervision financiero a bin ta expresa riba Presupuesto 2022. Den e carta Minister di Finanzas a bolbe reitera e compromiso di Gobierno di Aruba pa keda riba e caminda cu a encamina desde aña 2018 rumbo un finanzas publico solido, transparente y sostenibel.

Na man di informacion compila pa Fondo Monetario Internacional, IMF, e mandatario a mustra cu e situacion financiero di Aruba hopi biaha ta wordo malinterpreta y cu un opinion eroneo ta wordo crea riba, por ehempel, e nivel di entrada di belasting, gasto di servicio y producto, gasto di personal y quota di debe. Pa evita mas mal comprondemento riba aspectonan tecnico, Minister di Finanzas a brinda splicacion amplio riba e preocupacion nan cu CAFT a trece dilanti.

Producto y servicio

Pa locual ta trata costo pa servicio y producto, e mandatario a splica cu tin cu tene na cuenta e obligacion financiero cu ta surgi di contractnan vigente. Asina tin gasto cu ta wordo haci pa Aruba por atende debidamente cu programa di vacuna pa COVID (7 miyon florin), migracion di Venezolano, cuminda y medicamento pa detenido, adicto y refugiado (2,5 miyon florin). E huur pa edificionan traha cu e formula di PPP ta conoce indexacion di prijs y ta subi (2 miyon florin), y como cu personal di Gobierno ta ful back na trabou e gasto di utilidad ta subi (2 miyon florin). Gobierno mester tene cuenta cu inflacion di prijs cu tambe ta subi gasto. E gastonan a subi tambe cu compra di hard y software y licencia pa software pa KPA, Departamento di Impuesto y Departamento di Finanzas (5 miyon florin). Gasto di curso tambe a subi (900 mil).

Surseance di Serlimar

Pa locual ta Serlimar, e mandatario a splica cu e 3 miyon florin cu a pone disponibel pa Serlimar ta pa atende cu e situacion di ‘sureance van betaling.’ Si no haci esaki, Serlimar lo bati bancarota cu consecuencia pa salubridad, problema cu sushedad, daño na turismo y economia di Aruba. Minister Maduro a splica cu e suma a wordo poni disponibel conforme e reglanan di disciplina presupuestario.

Recorte di 12.6 porciento
 E mandatario a splica cu Aruba a cumpli debidamente cu e norma di gasto di personal manera stipula den e Protocol di aña 2018. Pa locual ta e recorte, Conseho di Minister di Reino a dicidi cu por paga back y Minister Maduro a splica cu e fondonan pa esaki lo bin door di reduci gasto di overtime y baha e vacaturanan cu ta ‘roll-over.’ Ademas a informa CAFT cu Gobierno ta trahando riba un plan nobo pa baha gasto di personal pa asina por bay cumpli cu e norma nobo di 10% di GDP na gasto di personal na aña 2027.

Loonbelasting
 Esaki ta un preocupacion cu a keda bin dilanti cerca CAFT cu ta pensa cu e loonbelasting a keda atras debi cu Gobierno a brinda alivio fiscal na cuminsamento di aña 2021. Riba e punto aki Departamento di Impuesto a sinta recientemente cu CAFT pa asina por a pasa den e resultado y haya un splicacion amplio den cual ta mustra cu e salarionan na Aruba no ta na nivel di aña 2019 ainda y esaki ta afecta e nivel di loonbelasting.

Compliance

Riba e punto di compliance e mandatario a indica cu a baha e suma presupuesta na prome instante ya cu e yudansa cu a wordo pidi na Hulanda pa por yuda colecta impuesto, no a yega. Cu e capacidad cu Departamento di Impuesto tin awor aki ta dificil pa por pone un entrada mas halto, pero ta bay haci un extra esfuerso pa por yega na mas entrada pa Pais Aruba.

AZV

CAFT a mustra preocupacion pa algun punto cu ta toca AZV, siendo cu den Presupuesto 2022 no tin fondo poni den forma di landsbijdrage pa AZV. Pa e motibo aki Minister Maduro a brinda un splicacion y a referi na e reunionnan tecnico cu ehecutivonan di salubridad den cual lo adresa e puntonan di AZV.

Inversion
 Pa locual ta e preocupacion cu CAFT a trece dilanti riba e financiamento di inversion via Hulanda, Minister Maduro a indica cu ta habri pa papia riba e proceso nobo aki pa Aruba por fia via Hulanda. E mandatario a indica cu esaki ta un proceso apart cu en principio no ta cay bou di evaluacion di presupuesto door di CAFT.

Presupuesto multi-anual

CAFT tabata tin pregunta tambe riba e cifranan den e presupuesto multi-anual cu ta compaña Presupuesto 2022. Ta trata di informacion riba BTW, crecemento economico y e cobransa di subsidio di salario. Tur informacion riba e preocupacionnan aki a wordo brinda na CAFT y Minister Maduro ta spera cu esaki tabata suficiente pa CAFT.

Deficit autorisa pa Parlamento ta 227 miyon florin

E mandatario a recorda CAFT cu e deficit autorisa pa Parlamento di Aruba ta 227 miyon florin y no e 236 miyon florin menciona den nan conseho.

Mester un balans pa yega na un finanzas publico sostenible

Na final di e carta Minister Maduro a enfatisa cu e meta comun ta pa yega na un finanzas publico sostenibel pa Aruba. Nos tabata riba e bon caminda, pero Covid su impacto financiero ta grandi. Esaki ta pone cu den un ‘cera y habri di wowo’ no por yega na e surplusnan necesario. Ta bay tuma tempo y mester haya e compromiso di tur actor envolvi. Mas aun pasobra mester haya un balansa entre ehecuta e reformanan di e ‘Landspakket’ y cumpli cu e normanan financiero stipula.

Nota di redaccion:
E splicacion di gobierno a laga algun pregunta habri. Por ehemplo, den protocol di november 2018,

den e seccion II articulo 4, ta bisa cu “Aruba ta tuma medida complementario pa termino mediano y largo pa laga e gastonan di personal structural sigui baha nominalmente.” Sinembargo, den e carta aki di gobierno no ta haci mencion mas di e medidanan complementario en cuestion. Esakinan si ta menciona den e Agenda di Ehecucion acorda cu Hulanda. Mientras tanto, ta mantene diferencia di opinion riba cierto criterio entre gobierno di Aruba y Colegio di Supervision Financiero, CAft. Pa un analisis extenso, por lesa nos Editorial di awe.