Segun e prome mandatario Evelyn Wever-Croes loke nan por a mira den e rapport di Contraloria General (ARA) cu a wordo trata den prome buelta den parlamento tocante e proyecto infrastructural ‘Bo Aruba’, ta un abuso serio y formal.
Pero e pregunta clave cu a surgi ta: Kico nan ta bay haci pa e situacion aki no bolbe ripiti. E prome mandatario a bisa cu nan lo sigui cu e recomendacion cu ARA a duna pa evita cu situacion asina no ripiti mas. Tambe nan a dicidi pa cada seis luna bin parlamento pa duna cuenta riba e situacion financiero di pais Aruba pa tene e institucion aki denter di e informacion cu ta wordo produci. Tambe lo wordo reforsa e institutonan y traha riba su independisacion pa nan por realisa nan trabou miho entre nan Raad van Advies (RvA), Contraloria General (ARA) y parlamento.
Di su banda, minister di Finanzas y Economia, Xiomara Maduro a remarca cu den e fraccion di oposicion tin ex minister di Infrastructura y ex minister di Finanzas di e gobierno anterior pero awor ‘cu nan mester duna cara’ pa atende cu e rapport di ARA, nan no t’ey. El a indica cu nunca e ex minister di Infrastructura no a duna ARA su opinion riba e rapport aki.
E mandatario a enfatisa cu a wordo gasta placa di pueblo sigur den proyectonan cu nan t’ey, pero bou un costo haltisimo cu ta pone un presion grandi riba finanzas publico. El a bisa cu te hasta den e proyectonan grandi PPP (Private Public Partnership) a usa companianan di construccion cu no ta local pa ehecuta nan.
P’esey awor cu nan ta wordo confronta cu e pago di e proyectonan aki, e placa di pago no ta bay pa lora economia di Aruba. “E placa aki ta bay pa lora otro economianan di afo,” Maduro a declara dunando contesta riba e preguntanan formula den e prome buelta di e tratamento di e rapport aki di ARA.
