Minister Xiomara Maduro di Economia ta informa: Cannabis medicinal lo por contribui na 10% di nos GDP segun estudio haci na 2018

Gabinete Wever-Croes a institui na aña 2018 un Comision Legalisacion di Cannabis pa conseha Gobierno riba legalisacion di cannabis medicinal. E comision su tarea tabata pa investiga e mercado internacional di cultivacion di cannabis pa uzo medicinal pa establece e industria aki na Pais Aruba. E industria no boa ki lo por sirbi como un otro pilar economico di Pais Aruba.

Estudio

E comision a acerca dos compania di renombre internacional na Hulanda y Alemania cu ta experto riba e tereno aki pa conduci un estudio pa averigua e impacto economico y financiero cu e cultivacion y exportacion di cannabis medicinal tin pa Pais Aruba. Resultado di e investigacion di tur e dos companianan ta, cu cultivacion y exportacion di cannabis medicinal ta un forma pa crea entrada significativo adicional pa Pais Aruba. E industria nobo aki lo crea mas cupo di trabou y lo genera entrada (impuesto ) pa Pais Aruba. Tur dos compania internacional ta recomenda pa considera e extraccion di cannabis tambe pa asina crea un ingreso adicional y a cu e industria aki lo stimula economia y e GDP di Pais Aruba.

Beneficio Impacto Financiero

E compania Aleman a haci un calculacion di e beneficio financiero di e industria di cultivacion y exportacion di cannabis medicinal bas ariba cifranan di Cuenta Nacional di 2017 di Pais Aruba. E calculacion ta indica cu riba un maximo di tereno di 350.000 metro cuadra pa cultiva lo por genera mas of menos 2.000 cupo di trabou na un averahe di $24.000 pa aña pa cada trahado. E industria di cannabis medicinal lo genera 470 miyon florin pa aña. E impacto economico aki ta representa 7.9% di nos GDP (pre covid) y actualmente esaki ta nifica 10% di nos GDP (post covid).Cifranan a conclui cu despues di Status Apartena aña 1986, ta e dos sectornan di turismo y refineria so tabatin un impacto asina grandi riba GDP di Pais Aruba. Basa riba e resultado financiero e comision a recomenda Gobierno pa considera cultivacion y exportacion di cannabis medicinal como un potencial pilar di economia di Pais Aruba.

Inversionista

E compania Aleman a haci tambe un estudio di mercado di cannabis medicinal. Resultado di e investigacion ta indica cu e mercado di cannabis medicinal ta grandi suficiente pa atrae inversionista y e mercado tin potencial di crece significativamente door cu actualmente tin mas aceptacion di cannabis medicinal como alternativa pa tratamento medico. Tin mas Pais den region ta trahando riba legalisacion di cannabis medicinal y ta atrayendo inversionistanan potencial. Ambos compania di Hulanda y di Alemania a recomenda pa Pais Aruba inicia cu implementacion di e industria aki rapidamente.