Dialuna ultimo Minister Xiomara Maduro a haci e apertura di ‘Aruba Investment Summit 2021’ na un manera virtual. ‘Aruba Investment Summit 2021’ a wordo organisa pa Departamento di Asuntonan Economico, Comercio y Industria.
E cumbre a inicia dialuna 21 di mei y lo termina diaranson, 2 di juni 2021. Un total di 341 participante di Aruba, Merca, Hulanda, Trinidad & Tobago, Curaçao y varios otro pais den region a participa na e cumbre aki.
ARINA
E mandatario a yama tur participante Bon Bini y a subraya e beneficionan di inverti na Pais Aruba. Alabes e dignatario a lansa e logo y e branding nobo di Aruba Investment Promotion Agency (ARINA), cu awor ta un unidad di Departamento di Asuntonan Economico, Comercio y Industria. ARINA ta consisti di un team di profesional cu tin como meta pa crea mas trabou den e sectornan nobo y prometedor di Aruba. E expertonan di ARINA lo conecta e inversionista cu e sector comercial, lo brinda tambe e informacion necesario tocante hacimento di negoshi na Aruba pa asina hacie mas facil pa e inversionista por establece na nos Pais.
Partnership ta e yabi pa exito
Minister Xiomara Maduro a subraya:”Den un economia unda comercio y inversion por duna forma na cambio economico, partnership ta e clave di exito. Den Aruba Trade Board nos ta combina conocemento y experticio y ta lidera un esfuerso coordina pa stimula comercio internacional y inversion pa negoshinan Arubano. E composicion di Aruba Trade Board ta asina cu ta crea un partnership structural entre sector publico y sector priva, cu Camara di Comercio di Aruba, Asociacion di Comercio (KvK) y Industria di Aruba (ATIA) y Free Zone Aruba como miembro. Mediante institucionnan manera ARINA y Aruba Trade Board, Aruba por promove su Sectonan Prometedor nobo na inversionistanan pa asina crea mas cupo di trabao, mas actividad economico y sectornan economico nobo. Door di informa inversionistanan cu Aruba tin mas oportunidad fuera di e pilar economico principal, nos por atrae innovacion, eficiencia y calidad, y nos por construi un economia Arubano resiliente! Pero nos mester storianan exitoso. Nos kier pa bo apoya Aruba den provee solucionnan isleño unico y innovativo, pa inverti y crea bo rikesa.”
Aruba One Happy Island
E mandatario a invita e participantenan pa network y participa na e sesionan di ‘Round table’ durante di e cumbre pa haña informacion con pa inverti na Aruba, pa cera un trato cu partnernan comercial y inverti na Pais Aruba. Finalmente e mandatario ta spera cu pronto e yama e particanteman Bon Bini na Aruba y pa hunto logra pa Aruba bira ‘Aruba One Happy Investment Island’.
