Ayera den un comunicado di prensa, minister di Asunto Economico, Geoffrey Wever a informa cu a duna compania di coriente di Aruba, Elmar, te diabierna pa bin cu un propuesta financiero pa establece prijs di coriente desde dia 1 di februari. Esaki den su capacidad como e minister encarga cu tarifa. Mientras tanto, su colega minister di Energia, Glenbert Croes, ta bisa di ta den dialogo continuo cu Utilities.
Den luna di juli di aña pasa WEB y ELMAR a informa Gobierno di Aruba cu como consecuencia di e aumento di prijs di petroleo riba mercado internacional, mester aumenta e prijs di awa y coriente. Gobierno di Aruba a verifica tur calculo y cifra financiero y a duna un aprobacion di 6 luna pa aumenta e prijs di coriente, bao di condicion cu 1 februari 2023 mester reevalua esaki, pues e aumento ta valido te cu 1 februari 2023. E aumento aki tabata necesario pa garantisa e suminstro di awa y coriente na Aruba.
“Mirando cu no tin un aprobacion di Gobierno di Aruba pa un ahuste di e prijs di coriente pa e periodo despues di 1 februari 2023, e facturanan cu ELMAR a emiti over e luna di februari 2023 ta den violacion di e concessievoorwaarden y nos a informa ELMAR na varios ocasion di esaki a traves di varios carta cu mi a manda ELMAR den nomber di mi mes como e minister encarga cu tarifa segun e concessie y tambe den nomber di colega Minister Glenbert Croes, cu ta encarga cu energia di Aruba”, Minister Geoffrey Wever a indica den un comunicado di prensa.
Segun e comunicado, ayera Minister Wever a suministra un carta den nomber di Minister Croes y Minister Wever na Elmar “pa informa cu nan tin te cu diabierna awor 31 di maart, 2023 – 12:00pm pa bin cu propuesta financiero pa nos por establece e prijs di coriente desde 1 februari. Prijs di coriente ta halto y ta afecta e costo di bida di tur nos ciudadanonan. Banda di esaki e ta un peso grandi pa gasto nan operacional di empresanan cu ta conduci inflacion directamente. Pa es motibo no por ta asina cu un tarifa ta wordo cobra cu no a wordo aproba door di Gobierno di Aruba.”
Segun e comunicado ta indica, Minister Glenbert Croes di su banda tambe ta den dialogo continuo cu Utilities, WEB y ELMAR pa varios siman caba y sa cu e empresanan ta trahando riba un propuesta pa Gobierno y ta confia cu pa diabierna e grupo di compania estatal lo cumpli cu demanda di Gobierno pa bin cu un propuesta nobo. Sinembargo, den luna di maart minister Croes mes no a menciona e problema cu e facturanan ta den violacion di concessievoorwaarden. Den un comunicado di prensa dia 6 di maart, a bisa: “Continuando cu e esfuerso di Gobierno di Aruba pa baha e prijs di awa y coriente, Minister Glenbert Croes a reuni cu e directornan di e companianan estatal, Utilities, Web y Elmar pa continua cu e plan pa baha e tarifa di awa y coriente. Minister Croes a splica cu e plan ta den proceso y unabes e ta cla, gobierno lo aprob’e pa asina, kisas na un forma gradual, cuminsa baha e prijs di awa y coriente. Gobierno di Aruba naturalmente lo tene cuenta cu e recuperacion di e companianan estatal, pero semper lo tin como prioridad e bienestar di Aruba su comunidad.” Den esaki no a duna ningun indicacion di e varios carta cu minister Wever lo a manda e compania estatal.
Sinembargo, segun e comunicado di Wever, ambos minister ta trahando hunto awo pa yega na un solucion. Diabierna lo mester bin mas claridad.
