Ayera mainta Comerciantenan Uni Aruba (CUA) a tene un conferencia di prensa cu a conta cu presencia di varios comerciante di sector priva, inversionista, bankeronan y tambe presencia di minister di Asuntonan Economico, Comunicacion y Desaroyo Sostenibel, Geoffrey Wever. Durante e conferencia a enfoca riba e tema di inversion pa revitalisacion di centro di Oranjestad.

Frans Ponson, presidente di CUA a trece dilanti cu durante e ultimo 20 aña por a mira cambionan den centro di ciudad, pero e no ta un secreto cu caya grandi a keda bay atras. Y aunke a purba diferente opcion, e ta bisto cu na final di dia lamentablemente e ta cerando.

El a indica cu gobierno a duna vergunning na Palm Beach y esaki ta un exito awendia, e ta prosperando cu turista, pero Oranjestad ta e capital, ta centro di e pais. El a señala cu ora un turista yega y pasa den centro di un pais, esaki ta duna un imagen di e pais y aki na Aruba actualmente e imagennan ey no ta mucho bunita.

“Mi no ta kere niun hende na Aruba, ni gobierno, ni e pueblo di Aruba kier pa turistanan wak e imagen aki. Nos kier mustra con importante caya grandi ta. Nos tin cu haci algo y un hende su so no por haciele,” el a remarca.

Ponson a resalta cu tin un cantidad di proyecto den caya grandi y adicionalmente tin proyectonan cu ta cla pa cuminsa den caya grandi.

El a splica cu tin inversionistanan local cu si ta kere den caya grandi y cu a inverti y awe ainda ta existi, pero ta un grupo chikito y pa drecha full Oranjestad, cambionan grandi ta necesario.

El a menciona cu den ultimo tempo gobierno a trece cambionan nobo, cambionan den Wilhelminastraat, tin hopi inversion di gobierno, cu cual e inversionista y localnan ta contento cune.

Ademas di esaki minister a publica siman pasa cu ta bay tin un studentenflat den e ex-edificio di OM, cual el a enfatisa CUA ta sostene completamente pasobra e ta trece movecion y studiantenan den caya pa yuda e comerciantenan.

Aunke tin deseo di parti di inversionistanan pa inverti den Oranjestad, tin hopi reto y obstaculo cu nan ta enfrenta. Ponson a remarca cu nan tin miedo pa wak inversionnan, mescos cu a wordo haci den pasado, cu despues ta caba na nada pa motibo di obstaculonan, manera entre otro tardansa di parti di departamentonan di gobierno.

“Nos kier sigura cu e biaha aki esey no ta pasa. Nos tin cu haci inversion y sigura cu e cos aki ta bira un exito. Nos kier puntra gobierno, gobierno no por haci’e su so, inversionista no por haci’e su so, y pakico nos por trece tur e banconan ta pa nan por wak cuanto proyecto tin pa caya grandi y hunto por haci algo,” el a destaca.

Ponson a señala cu tin inversionistanan cu tin e manera pa haci un inversion riba nan mes y warda un periodo di tempo mas largo pa por realisa e proyecto, pero tin inversionistanan cu mester di banconan y no por tin dilemanan cu ta tarda nan lunas pa construi.

Pa e motibo aki CUA ta acerca gobierno pidiendo ayudo cu e tipo di obstaculonan aki y a sugeri pa CUA y inversionistanan sinta cu gobierno y tur e departamentonan hunto pa bin cu un solucion.

Di su banda, minister Wever a enfatisa cu ora el a drenta gobierno el a puntra si e por ta encarga cu e parti di Oranjestad pasobra e ta kere den e potencial di Oranjestad y e kere cu tin oportunidad pa e inversionistanan local primordialmente.

“Desde cu mi a bira minister mi a purba mediante diferente proyecto y scuchando e diferente stakeholders pa pusha desaroyo den Oranjestad y manera CUA a indica e ta algo cu gobierno su so no por haci,” el a indica.

E mandatario a resalta cu gobierno kier haci partnership cu sector priva, locual tabata e vision desde comienso. El a remarca cu tur e proyectonan cu gobierno ta haciendo ta den consulta directo cu sector priva. “Nos purba cu e fondonan cu tin haci proyectonan real, proyectonan tangibel, no solamente bin cu palabra bunita, pero set un vision y ehecuta un vision,” el a agrega.

Tocante con gobierno por yuda e inversionistanan realisa nan inversionnan mas rapidamente y supera obstaculonan, minister Wever a splica cu ta necesario pa sigui traha cu otro. El a subraya cu e departamentonan di gobierno mester coopera y alabes a compromete su mes pa yuda busca e forma con por bin cu un plataforma cu ta traha den un forma mas acelera y no den un forma ad hoc.

E mandatario a enfatisa cu gobierno ta ofrece un partnership real, y hasta talbes drenta den un MoU caminda tur e inversionistanan ta priminti cu ta bay inverti, cu ta bay ehecuta e proyectonan den caya grandi, y tambe a haci yamado pa e banconan participa den esaki, pa nan tambe priminti di forma parti di esaki pasobra e banconan ta necesario pa financia e proyectonan.

“Mester busca un forma conhunto y bisa esaki ta e vision, y si tur hende dicidi di aporta na esey, mi ta kere cu e chens ta hopi mas grandi cu nos por realmente revitalisa e centro di Oranjestad,” el a destaca.

E mandatario a agrega cu gobierno tambe mester ta un partner y priminti cu ta bay sigui inverti den infrastructura, den infrastructura di e cayanan, den mas luz, den mas seguridad, yuda resolve e problemanan, pero tambe usa e fondonan cu tin pa por ehempel restaura edificionan cu tin bashi den centro di ciudad.

Pa loke ta con por aborda e retonan y desafionan cu inversionistanan ta encontra manera por ehempel e “red tape” cu nan ta encontra na cierto departamento, minister Wever a indica cu tin un manera pa yuda cu esaki cu ya caba ta den proceso.

El a splica cu tin hopi proyecto comercial cu ta cla pa cuminsa, pero mester un push di gobierno. Pa asisti den esaki, el a sigui splica, varios minister a organisa un tipo di cooperacion cu ta bisa cu proyectonan cu ta wordo apunta como proyectonan di prioridad, entre otro den Oranjestad, ta haya tambe un respaldo pa asina di un forma mas organisa por laga un proyecto bay dilanti. El a clarifica cu dentro di poco lo bin mas claridad riba esaki pero ta algo cu ta den preparacion pa algun tempo caba.

“Mi ta kere tin un base hopi solido, tin un animo hopi grandi y mi ta kere tin suficiente, capital, suficiente conocemento y suficiente oportunidad economico pa hunto revitalisa e centro di Oranjestad,” el a enfatisa.