December 19, 2022, Minister mr. Geoffrey Wever di Economia, Comunicacion y Desaroyo Sostenibel a reuni cu miembro di Raad van State Sra. mr. Milly Schwengle. Sra. Schwengle ta representa Aruba den Raad van State na Hulanda cu ta un organo di estado cu ta duna conseho riba conceptonan di ley.
E representante di Aruba, hunto cu e representantenan di e otro paisnan den Reino cu ta Korsow y Sint Maarten te duna conseho riba conceptonan di ley ora esakinan ta concerni tur e paisnan den Reino.
Den e reunion a toca varios punto interesante pa Aruba manera e efectonan cu cambio di clima por tin riba economia di Aruba, por ehempel ora e nivel di awa subi como consecuencia di e aumento di temperatura na mundo, esaki por tin efectonan grandi pa Aruba su beachnan y pa full e sector turistico, pues pa economia di Aruba y tur ciudadano.
E topico aki cada biaha ta keda bin back den tur combersacion tambe riba nivel internacional mirando cu cambionan climatico lo afecta henter mundo pero specialmente paisnan chikito manera Aruba, cu no tin influencia riba e aumento di clima door cu Aruba ta asina chikito. Paisnan grandi si tin efecto mirando cu hopi biaha nan ta esnan cu ta ‘heavy poluters’. Riba nivel internacional tin varios combersacionnan con pa proteha paisnan chikito contra e efectonan negativo di cambio di clima.
“Como Minister encarga cu economia y tambe desaroyo sostenibel esaki ta un topico cu tin mi atencion y lo bira sumamente relevante den e periodo nos dilanti”, segun Minister Geoffrey Wever.
