Minister Geoffrey Wever, durante un rueda di prensa, a presenta na pueblo di Aruba dos miembro Raad van Bestuur di Aruba Fair Trade Authority (AFTA). Pa por jega na candidatonan capacita pa e funcion di miembro di Raad van Bestuur di AFTA a sigui un proceso transparente na cual por medio di un decreto ministerial a stipula e profiel pa e funcion (functieprofiel) di miembro di Raad van Bestuur AFTA.
A instala tambe un comision di solicitacion por medio di un decreto ministerial pa haci e parti di e solicitacion (werving en selectie) y e voordracht di e candidatonan na Minister Wever y na Conseho di Minister.
E comision di solicitacion tabata consisti di diferente profesional: un profesional Hulandes implementatiemanager di AFTA, Presidente di Corte Commun di Husticia pa Aruba, Curaçao, Sint Maarten en van Bonaire, Sint Eustatius en Saba Sr. Maurits de Kort y un represenante di adviesbureau internacional Deloitte Dutch Caribbean. E proceso di solicitacion pa miembro di Raad van Bestuur AFTA tabata uno transparente y formalisa. Despues di e proceso di solicitacion e comision a postula dos candidato pa bira miembro di Raad van Bestuur di AFTA. Riba conseho di e comision di solicitacion, Minister Wever a aproba esaki.
Diabierna 6 oktober 2023, Minister Geoffrey Wever a presenta e dos miembronan di Raad van Bestuur AFTA. Ta trata di Sr. F.R. Sint Jago cu a wordo nombra presidente di Raad van Bestuur di AFTA y Sr. T.M. Snoep cu a wordo nombra ‘gewoon lid’ di AFTA.
Pa varios luna Minister Wever y e team di implementacion ta bezig cu e trabounan preparatorio pa AFTA por cuminsa opera. E proyecto aki ta wordo financia cu fondo Hulandes y cu fondo di Aruba. E ultimo lunanan e team di implementacion ta bezig ta prepara website, oficina, proceduranan, HR beleid, AO/IC, profielschetsen pa miembronan di e Raad van Bestuur, etc. Actualmente ta kedando cla cu e oficina di AFTA pa e trabounan di AFTA pa pueblo di Aruba por cuminsa.
“Mi ta contento cu e proceso transparente di nombracion di miembronan di Raad van Bestuur di AFTA a keda conclui. Pueblo di Aruba por a sigui e desaroyo di implementacion di AFTA y asina haya mas y mas conocemento di kiko AFTA lo significa y vooral cual ta e beneficionan di AFTA. AFTA lo mehora competencia entre companianan na Aruba, cu lo tin como consequencia cu tin mihor prijs y mihor calidad di producto y servicio. AFTA ta birando un realidad!”, Minister Wever a comenta.
