Dialuna mainta durante un conferencia, Ministro Dangui Oduber (MEP) a splica tocante algun desicion cu ta tumando luga den e Ministerio di Turismo, Salubridad y Deporte. Den e caso aki tocante e cas di fundacion nobo pa lotto pa deporte.

Oduber a comparti cu for di algun tempo tabata tin intencion pa bin dilanti cu fundacion nobo di lotto cu lo mester competi cu e fundacion actual cual segun e mandatario ta un ‘grupo cu ta abusa di fondo di lotto’.

E mandatario ta mira importancia di e fundacion nobo mirando cu fundacion lotto pa deporta no a dirigi entrada na su destinacion cu ta pa deporte ‘manera debe ser’. Tambe ta expresa cu, tur facilidad deportivo cu Fundacion Facilidad Deportivo ta maneha, ta den mal estado.

Pa e motibo ey, ta bisa cu tur dos stadion caminda por organisa wega internacional di futbol, a ser rechasa. “Tur esey ta motibo valido pa un fundacion nobo ta na su luga. E fundacion su proposito principal ta pa genera entrada y esaki ta pa inverti den mantencion di infrastructura, iluminacion y mantencion di facilidad cu ta den plan caba.”

E nomber di e fundacion di lotto nobo lo ta Fundacion Nacional di Salud y Recreacion. Oduber ta splica cu a pone e nomber salud mirando cu comunidad di Aruba ‘no ta esun di mas saludabel’.

Sinembargo e ta splica cu mester cuminsa enfoca riba prevencion y cu medio di benta di lotto, nan lo por inverti un cantidad bon di placa pa consientisacion di comunidad. Pa brinda informacion, cu campaña pa keda informa comunidad con importante ta pa tin un bida saludabel.

Den e fundacion lo brinda informacion pa persona por come saludabel, mantene activo den area di ehercicio. Segun Oduber, pa e parti di recreacion ta bay hinca deporte y tambe cultura. Den area di deporte ta mantencion di facilidad y mehoracion di infrastructura.

Sinembargo e fundacion lo tin otro proposito pa motibo cu el a splica cu fundacion lotto pa deporte cu tabata genera entrada y traspasa pa stichting sports subsidie Aruba, e stichting aki ta parti bou di diferente federacion deportivo. Esey lo keda normal cu lotto pa deporte pero cu competenia di e fundacion nobo.

“Nos comunidad lo tin cu scohe entre dos loteria. Uno cu placa no ta yega na su destino, pasobra mayoria di entrada ta bay pa Canada. 54 miyon florin ta bendi na lotto, cual di esaki 4 miyon ta bay pa deporte”, Oduber a splica.

Den e fundacion nobo el a bisa cu ta lo contrario y cu deporta lo haya su ‘fair share’. E grupo cu lo maneha lotto, tambe lo tin nan derecho di gana placa pero e maneho lo ta contrario di con e ta actualmente ‘un reparticion husto’.

Actual e no ta un reparticion husto, e mandatarioa bisa cu cantidad di e fondo ta pa biaha, pone camara di siguridad, pa miembro di hunta directiva por haci negoshi. Pa e motibo aki ta importante pa e fundacion nobo su statutonan ta cla.

Pa finalisa el a bisa cu pa formalisa e acto den notario, fraccion di MEP mester haci cambio di ley necesario pa un di dos loteria. “Na momento cu ley aki bin ta kita e exclusividad duna na Fundacion Lotto pa Deporte. Un competencia sano y saludabel”, Oduber a expresa.