“Un bes bo lo regula, bo lo tin un miho control di kico tambe ta pasa den nos awanan”

Minister di Naturalesa y Medio Ambiente, Ursell Arends a informa cu nan ta trahando full un maneho pa loke ta trata spearfishing caminda nan ta pasando den proceso di prohibi of un gedoogbeleid pa un proceso unda spearfishing ta bay keda regula.

Asina minister Arends a informa na redactor di Bon Dia Aruba na unda tambe a comenta cu na e momentonan aki e maneho ta cla y den su fase final, nan a sinta cu tur stakeholders pa ricibi nan imput y asina ey ora e maneho lo bay presenta ta carga e sosten di tur stakeholders cu mester sostene esaki tambe y na e momentonan aki e maneho ta bay sali for di su ministerio pa bay conseho di minister y haya un aprobacion prome cu e por cuminsa su caminda pa bay Directie Wetgeving en Juridische Zaken (DWJZ) pa despues bay Raad van Advies y asina yega Parlamento di Aruba “pasobra e ta bay rekeri cambio tambe di ley,” minister a sigura.

Aworaki, nan ta den proceso ey y pa fin di juni e proceso pa yega DWJZ ta bay formalisa caba, pero prome cu esey den proximo simannan esaki lo keda trata den conseho di minister.

“Esaki ta algo hopi importante,mi mes a tuma nota durante conferencia di agricultura cu a tuma luga siman pasa cu SABA ya tin’e regla caba y mi ta kere Aruba tambe no mester keda atras, esaki ta un proceso cu bo ta pasa di un caminda di prohibi pa regula y mi ta kere un bes bo lo regula, bo lo tin un miho control di kico tambe ta pasa den nos awanan.”

Pa loke ta trata e preocupacion di piscadonan, minister Arends a señala cu nan a organisa nan mes y Gobierno a duna un presentacion na nan bisando kico ta e direccion cu Gobierno kier bay, nan a apunta un total di seis persona pa tabata nan representante den full e trayectoria pa crea e maneho nobo pa spearfishing for di comienso y nan ta dunando full sosten na esaki manera minister Arends a declara.

Pa finalisa, el a sigura cu prome cu aña lo caba, lo tin un maneho nobo pa spearfishing.

Na juli di aña pasa, minister Arends a informa mediante un comunicado cu a reuni cu un grupo grandi di piscado di harpun (“spearfishers”) pa splica na e grupo e intencion di minister pa regula spearfishing por medio di legislacion, en bes di prohibi’e por completo.

E intencion tabata pa introduci un maneho nobo entrante 1 di augustus 2022, pero a splica cu pa brinda suficiente espacio pa inclui tur stakeholders den e proceso, e periodo di e gedoogbeleid actual a keda extendi mientras e maneho nobo ta wordo concretisa.

Conforme palabracionnan haci, minister Arends tabata tin e oportunidad pa dialoga cu stakeholders (profesional-, autoridad-, piscado- y ambientalistanan) riba e tema di regulacion. For di e grupo di piscado, a apunta un total di seis (6) persona cu ta forma parti di e sesionnan pa finalisa e maneho definitivo, e personanan apunta ta practica e actividad, y asina por brinda conocemento y experiencia for di e banda di piscado, pa crea un maneho cu por ser carga pa e partidonan envolvi. E personanan aki ta: Frederick Quandus, Marvin Thiel, Edward Dirksz, Bogdanovic Carolina, Jonathan Koole y Aby Kock.

Basa riba combersacionnan amplio cu stakeholders y tumando den consideracion rapportnan, tratadonan y consehonan ta yega na e conclusion cu base amplio cu speervissen (“spearfishing”) ta un di e formanan mas sostenibel di pesca, semper y cuando esaki ta bon regula y controla.