Minister Ursell Arends tocante Casnan di Cuido: “Gobierno no ta di acuerdo cu reduci cantidad di cama y di otro banda exigi pa mas fondo”

For di casi tres luna caba, e topico di casnan di cuido a bin dilanti, na unda tambe a indica riba e ceramento di un cas di cuido ubica na San Nicolas na luna di october. Esaki a trece un preocupacion den comunidad cu tin nan sernan keri den cas di cuido y tambe di algun parlamentario.

Redactor di Bon Dia Aruba a tuma contacto cu minister encarga cu Cuido di Nos Grandinan, Ursell Arends, na unda a haci par di pregunta tocante e topico aki, e plannan cu tin pa e casnan di cuido, su clientenan y empleadonan ademas di e discusion di un investigacion cu tin riba pago di empleadonan na unda un mediador di gobierno mester intermedia den esaki.

Ta berdad cu Cas di Cuido ubica na Palisiaweg, San Nicolas ta bay cera of ta bay saca clientenan afo di e casnan di cuido?

Minister Arends a contesta: “Mi tambe a tuma nota pa medio di un anuncio na publico di Stichting Algemene Bejaardenzorg Aruba (SABA) cu nan a scoge unilateralmente pa hiba un maneho di reduci cama cu finalmente e intencion pa entrega e localidad Centro di Cuido San Nicolas. Inmediatamente mi a informa SABA por escrito cu esaki no ta aceptabel. Ademas di e aspecto humano, for di e punto di bista financiero Gobierno no ta di acuerdo cu un maneho cu ta reduci cantidad di cama di un banda y di otro banda ta exigi pa gobierno duna e fundacion mas fondo”.

Igualmente el a sigura cu “actualmente SABA ta ricibi subsidio pa capacidad di 230 cama. Ningun momento mi a duna aprobacion pa SABA reduci cama na Centro di Cuido na San Nicolas of cualkier otro localidad cu SABA ta maneha”.

Minister Arends a splica cu dia 2 di december su persona tabata tin un reunion cu RvT di SABA ariba e tema specifico aki y tambe otro tema cu ta regarda e situacion na SABA. Durante e reunion RvT di SABA a informa minister pa prome biaha ariba e vision nobo aki di SABA.

“Cosnan asina mester bay por escrito y mi a informa e RvT di SABA pa pone esaki por escrito. Alabes mi a bisa e RvT di SABA pa stop cu reduccion di cama y trece e cantidad bek na 230 cama. E capacidad di 230 cama ta loke gobierno ta financia, pero ta resulta cu SABA a reduci esaki te na 190 cama. Esaki ta un reduccion di 17% di cama y a haci esaki sin pidi ningun areglo nobo cu Gobierno. E desaroyo aki no ta aceptabel mirando cu hustamente tin un necesidad grandi pa cuido di adulto mayor. Actualmente tin un lista di espera enorme cu ta sigui crece tur dia.

Tambe el a comenta cu “na aña 2017 caba Gobierno (minister Schwengle) a yega na acuerdo cu SABA pa reduci e cantidad di cama for di 279 pa 230. Un reduccion e tempo ey caba di 18%. E tempo ey SABA a aproba pa e fundacion sigui ricibi for di Gobierno e total subsidio di 22.5 miyon florin, aunke ta pa menos cama”.

A expresa cu “ademas di e forma iregular y unilateral cu a baha e cantidad di cama, ta surgi e pregunta si Gobierno mester sigui acepta sin mas subimento di prijs y e reduccion di cama na momento cu tin un lista di espera pa cuido cu ta sigui crece.  E maneho asina di parti di SABA no por ta unilateral y mester wordo coordina cu esun cu ta pone e fondonan disponibel. E cambio di baha cantidad di cama ta un desaroyo den e direccion contrario na momento cu den nos comunidad e lista di adulto mayor cu ta en espera di cuido ta subi, den conclusion SABA su maneho ta pa reduci cama y hisa e suma di subsidio pa cada cama,” minister Arends a informa.

Pa loke ta trata e plannan pa SABA y Centro Medico pa Cuido Cronico, minister Arends a señala cu  fundacion SABA ta transformando nan mes den un hospital chikito pa cuido di malesa cronico, mientras su persona nunca a ricibi un plan di esaki por escrito.

“E fundacion a tuma e direccion aki unilateralmente. SABA no ta un fundacion di gobierno y gobierno no tin un representante den e fundacion SABA, ta nifica cu ta existi un relacion comercial den cual gobierno ta aloca fondo y SABA mester entrega servicio. Gobierno ta aloca 22.5 miyon florin tur aña sin tin un bista of algo di bisa den e maneho di e fundacion. Pa despues bin tende cu e fundacion ta move den e direccion contrario na e maneho di gobierno. E maneho aki di haci SABA di un hospital chikito no ta e servicio cu gobierno ta cumpra for di SABA.  E relacion entre gobierno y SABA ta basa riba e Subsidieverordening Instellingen van Openbaar Nut.”

“Pa esaki e conclusion ta cu SABA su vision nobo cu no ta den cuadra cu esun di gobierno, pues ta cuadra cu e motibo pa cual SABA ta ricibi subsidio for di Gobierno. Ami a insisti riba un ministerio di Adulto Mayor, hustamente pasobra nos adultonan mayor mester di mas asistencia. Semper lo mi sali na vanguardia tambe di esunnan cu ta dedica nan mes na atende cu e adulto mayor. E fondonan cu Gobierno tin pa haci esaki mester wordo aloca debidamente.” Minister a declara.

Tocante investigacion cu ta andando na SABA den cual trahadonan tin problema pa cubri y paga e bashi premie y nan a bisa cu gobierno no a duna e placa necesario pa paga trahadonan, kico a wordo palabra den reunion cu a tuma luga na Cocolishi den cual un consehero di minister tabata presente pa papia tocante esaki? y dicon Minister mes no tabata presente?

“E reunion di diamars ultimo tabata den cuadro di e acuerdo laboral cu  tin entre SABA y su empleadonan.  Gobierno no tin un relacion directo cu e empleadonan, pero e fundacion a laga e asunto escala di tal forma cu tanto e trahadonan y e clientenan lo a sali perhudica. Riba peticion di mediador, un reunion di caracter di urgencia a wordo yama. Aunke mi ministerio cu no ta forma parti di e relacion entre e trahado y gerencia di SABA, nos a participa na e reunion aki. Aunke urgente, e reunion a wordo yama na ultimo ora y mi mes no por tabata presente. Sinembargo, mirando e embergadura y pa evita cu e situacion ta sigui escala y cu finalmente lo afecta e cuido di nos adulto mayor cu ta biba den SABA, mi a pidi mi conseheronan pa atende e reunion. Mi a instrui nan pa busca tur posibilidad caminda gobierno por interveni entre e partidonan pa asina yega na un solucion.”

Tambe, el a splica cu durante e reunion a keda acorda cu ta duna SABA un adelanto ariba su subsidio 2023 pa asina nan por cumpli cu e acuerdo entre e fundacion y su empleadonan. Aunke cu Gobierno di Aruba no tin un relacion directo cu trahadonan di SABA e ta haya ta necesario pa saca un man pa yuda pa asina yega na e paz laboral y continuidad den cuido di adulto mayor cu ta un responsabilidad di su ministerio.

“Mi mester bisa si cu esaki ta un pleister. E situacion financiero real di e fundacion ta desconoci.  E ta un situacion cu e RvT mester atende cu gerencia pa nan soluciona. E situacion aki ta un situacion cu ta existi for di prome cu mi a asumi e encargo di e cartera di Adulto Mayor. Hustamente pa e falta di bista riba e situacion financiero, e hecho cu e cantidad di cama no ta na ordo y e fundacion a tuma otro rumbo, mi a inicia cu un investigacion. Gobierno ta exigi claridad den e maneho financiero.  E discusion aki entre Gobierno y SABA tin varios aña andando y na final ta e trahadonan ta wordo perhudica. Ora trahadonan wordo perhudica ta e clientenan tambe ta wordo perhudica. Dentro di poco e investigacion lo keda finalisa”.

Na e momentonan aki, gobierno tin un acuerdo di huur di 1 florin cu SABA pa loke ta trata e uso di e edificio di Paviljoen  na Playa y Centro di Cuido San Nicolas, e edificionan aki ta di gobierno, pero e huurdo ta encarga cu mantencion. For di SABA gobierno ta cumpra servicio di gerencia y e trahadonan. “Mi a inicia e proceso pa investiga condicion di e edificionan. For di SABA mes mi no a haya ningun concern pa loke ta trata mantencion. Pero como doño di edificio Gobierno di Aruba kier sa e condicion di su propiedadnan. Durante un bishita mi mes a tuma nota di algun cos y mi a dicidi cu un inventarisacion di e situacion di e infrastructura ta necesario”, el a finalisa.