Aruparking ta sigui keda un topico vigente den comunidad na unda tin cierto incertidumbre si esaki ta bay sigui of kico ta bay sucede cune, mirando cu e mashinnan t’ey ainda, pero e sistema no ta funcionando.
Pa cu e topico aki, Bon Dia Aruba a tuma contacto cu minister di Transporte, Integridad, Naturalesa y Asuntonan di Adulto Mayor, Ursell Arends pa asina ey duna mas informacion tocante esaki, ya cu den un entrevista cu Telearuba, director di Aruparking, Sr. Edwin Mohamed, a sigura na october di aña pasa cu Aruparking ta bay bin back pero cu un maneho nobo.
Redactor a puntra minister Arends con esaki ta bay tuma luga? Si por splica un poco tocante e proceso of maneho nobo cu esaki ta bay tin y si ta bay tin cambio den ley? ya cu luna di maart ta pasando y comunidad no a scucha nada mas di e sistema aki.
Minister Arends a contesta cu “Aruparking ta bay tin un herstart di 2 fase: den e prome fase no lo tin un cambio di ley, pero den e segunda fase probablemente si lo bin un cambio di ley y lo anuncia esaki despues.”
Tambe a puntra con comunidad por para auto y paga pa parkeer pero tin mashinnan cu no ta traha, kico Aruparking ta haciendo pa esey na e momentonan aki?
Minister Arends a contesta cu “e ley di parkeo ta vigente ainda, dus mester paga pa parkeo. E control riba un forma estricto no ta tumando luga mirando cu no ta tur mashin ta funcionando. Si un vehiculo staciona den un vak blanco e no lo haya un sticker. Aruparking ta den proceso pa pone tur mashin operacional back.”
Debi cu ta bay bin un maneho nobo, tambe ta bay tin mashinnan nobo of ta bay drecha esnan cu ta daña?
“Ta bay tin mashinnan funcionando na tur zona di parkeo, sea nobo of esnan existente,” minister Arends a expresa.
Mirando cu te awo, e sistema no ta traha, ta posibel den cierto luganan pa parkeer auto den vaknan geel? mirando cu na diferente luga no tin suficiente espacio pa parkeer of e persona ta haya un sticker?
“E sistema pa paga no ta funcionando optimal en berdad, pero no ta permiti pa para den vaknan geel. Esakinan ta pa e vergunningshouders. Dado caso cu para den vak geel e posibilidad ta existi pa haya un sticker si no tin vergunning.”
E parti di duna sticker na autonan para den vak geel sin vergunning ta forma parti di e campaña di conscientisacion prome cu restart Aruparking. Con un persona por haya un vergunning pa para den vak geel?
“Por tuma contacto cu Aruparking”, el a sigura.
Di loke ta trata e klem y takwagel, esaki tambe ta bay wordo activa of ta bay tin un otro forma den esaki?
“Pa e prome fase di Aruparking lo tin cambio di beleid pero e parti di overtreding lo conoce cambio den e di 2 fase.”
Pa finalisa, e mandatario a sigura cu e prijs tanto pa comunidad y pa turista ta bay keda igual cu ta AWG. 2.00 pa ora.
