Oranjestad – Ministerio di Naturalesa ta anuncia un desaroyo crucial pa Aruba su futuro den sector primario. Dia 1 di september 2023 a establece e Stuurgroep Good Corporate Agriculture (GAP), bon practicanan di Agricultura.

E motibo principal pa establece e ‘Stuurgroep’ ta pa desaroya un programa robusto di cetrificacion GAP cu ta contribui na produccion y consumo di cuminda mas sigur y di calidad halto. Esaki ta crea oportunidad significante tambe pa exportacion den exterior door di agricultornan local.

E ‘Stuurgroep’ tin como tarea e desaroyo di e programa di GAP, plan di implementacion y presenta accionnan concreto pa cumpli cu tur reglanan tecnico y operacional (internacional) relaciona cu practicanan di agricultura na Aruba. E programa lo enfoca riba diferente aspectonan manera comprendemento di riesgonan di contaminacion, seleccion di tera pa proteccion di consumidor y medio ambiente, normanan di certificacion di GAP pa agricultura y cria di bestianan, cadena di suministro di cuminda (almacen, transporte, etc.), ley y reglanan, higiena, control y inspeccion, y tur otro aspectonan relevante na GAP.

E ‘Stuurgroep’, su miembro nan ta interdepartamental y interministerial consistiendo di Directie Landbouw, Veeteelt en Visserij (voorzitter), Directie Natuur en Milieu, Directie Volksgezondheid, Directie Economische Zaken, y representante di Ministerio di Asuntonan Economico y tin un mandato pa e proximo tres luna.

E ‘Stuurgroep’ por busca sosten pa nan tarea for di otro departamento di gobierno y institutonan cu por contribui di algun manera na nan trabou. Tambe nan por ricibi asistencia for di un of mas expertonan independiente y imparcial den nan trabou.

Dentro di tres luna e ‘Stuurgroep’ tin e responsabilidad pa presenta na e Minister di Transporte, Integridad, Naturalesa y Asuntonan di Adulto Mayor nan resultadonan, conseho, plan y accionnan concreto.

Minister Arends ta contento di e esfuersonan diligente pa e programa di GAP cu ta habri portanan pa Aruba su agricultornan por prospera tanto local como internacional.