Un di e proyectonan cu lo no keda realisa prome cu cambio di gobierno ta un seguro general pa piscadonan, asina Minister di Naturalesa, Ursell Arends a duna di conoce.
Rond mundo por mira e impacto devastador di cambio climatico. Aruba lo no scapa di esaki. Pa por prepara nos mes pa por confronta un clima mas agresivo, Minister di Naturalesa a pidi asistencia di diferente instancia y expertonan di Merca y Hulanda. Tanto Stimson Center di Merca y Climate Adaptation Services di Hulanda ta analisando kico cambio di clima realmente lo nifica pa Aruba. Di e forma aki nan lo yuda Aruba formula un plan strategico pa atende cu cambio climatico. Basa riba informacion cientifico Aruba lo por dicidi kico por haci y den kico mester inverti.
“Pero mientras ta canando e pasonan aki, nos no mester warda riba ningun hende pa bisa nos cu nos piscadonan lo ta entre e promenan cu lo wordo afecta,” minister Arends a menciona. “Nos no mester warda resultado di ningun investigacion pa nos tuma pasonan pa protege nos piscadonan y nos industria di pesca.”
Un di proyectonan di Ministerio di Naturalesa tabata pa cera un seguro cu lo cubri e piscadonan contra desasternan natural. Cu cambio di gobierno, e proyecto aki ta keda un tarea pa e proximo gabinete.
“Esaki ta un seguro special y cu bo no por cumpra unda cu ta,” Minister a cuminsa na splica, “ta diferente pais den nos region a bin hunto pa traha riba un sistema di seguro cu por cubri ful un sector economico, manera pesca, contra impacto di cambionan climatico. Esaki ta na beneficio di e piscadonan, pero alabes ta reforsa siguridad di alimentacion pa nos tur.”
Minister Arends ta splica cu e instancia CCRIF tin un producto di seguro pa calamidad cu a keda demostra di ta efectivo. “E tipo di seguro aki ta paga rapido, y nos piscadonan ta wordo compensa rapido pa asina nan por ekipa nan mes back na un forma eficiente pa nan por sigui haci nan trabou.”
Pa e motibo aki Minister Arends a haci un apelacion na Santa Rosa y departamento di asuntonan economico (DEZHI) pa hunto cu e comision nacional di cambio climatico (NCRC) duna prioridad na e proyecto aki y haci tur lo posibel pa trece e proyecto na atencion di e proximo gabinete. Tur tres instancia conoce e seguro di CCRIF, pero loke falta ta pa Gobierno pone esaki riba presupuesto.
“Mi tin tur confiansa cu e proximo minister di naturalesa of di sector primario lo compronde e peliger cu cambio climatico ta trece pa nos hendenan y sigur pa nos piscadonan, y cu e Gabinete nobo lo haci tur loke ta posibel pa pone fondonan disponibel den presupuesto di nos pais pa asina proteha nos piscadonan,” Minister Arends a reacciona.
Impacto di cambio climatico pa Aruba
Mei di aña pasa, International Panel on Deltas Coasts and Islands (IPDC) a lansa e rapport tocante e estado di adaptacion climatico den deltanan, areanan costal y islanan, cu contribucion di tur isla den Caribe Hulandes. E rapport ta un compilacion di contribucion activo di Aruba, Boneiro, Corsou, Sint Maarten, Saba y St. Eustatius, y ta provee un analisis profundo di e desafionan climatico cu e islanan ta enfrenta, hunto cu strategianan y plannan relaciona cu adaptacion climatico.
E rapport, cu ta disponible riba e website di National Climate Resilience Council of Aruba, ta indica cu e delta-, costa- y islanan chikito ta particularmente vulnerable pa e impacto di cambio climatico. E areanan aki hopi biaha ta densamente pobla y nan ta di importancia crucial pa sociedad, economia y ecosistema.
Aruba tambe a participa na e rapport aki, cual ta indica cu como un isla chikito cu un economia habri, Aruba ta altamente expuesto y vulnerable pa varios shock exterior, incluyendo, pero no limita na, shock financiero-economico y geopolitico, como tambe shock ambiental y climatico. Den termino di exposicion y vulnerabilidad di cambio climatico, e rapport ta señala cu Aruba ta expuesto na tanto shock climatico como kimamento climatico lento. Ademas e ta resalta cu volatilidad climatico y patronchi di clima extremo a aumenta durante e ultimo siglo.
