Durante siman cu a pasa, Minister Ursell Arends a reuni cu representantenan di piscadonan di harpun pa loke ta trata nan colaboracion pa yega na un maneho di Spearfishing nobo.
Ya caba pa varios siman, ministerio di naturalesa ta atendiendo diferente reunionnan unda tin intercambio di conocemento y tambe proposicionnan cu ta wordo treci dilanti, pa asina yega na un maneho unda e practica di tira pisca y conservacion di naturalesa por ta den balans harmonioso.
Pa cu e reunion a invita diferente departamentonan concerni pa ta presente, entre otro DLVV (Santa Rosa), DNM (Directie Natuur & Milieu) FPNA (Fundacion Parke Nacional Aruba) y Kustwacht. Involucrando e stakeholdernan cu ta atende directamente cu e practica y efecto di spearfishing, ta sigura esfuersonan conhunto pa yega na un maneho definitivo cu lo mester wordo regula por medio di ley y pa asina percura cu spearfishing por tuma luga na un forma controla, regula y sostenibel.
Ministerio di naturalesa lo continua cu e reunionnan den e proximo siman nan, unda lo sigui delinea entre otro e proceso di permiso y reglanan di practica, pa asina pronto anuncia e maneho.
Minister Arends ta gradici tur stakeholder y specialmente e grupo di piscadonan di harpun cu ta acudi na e reunionnan aki y ta brinda nan conocemento y experiencia cu ta aporta na discusionnan sano y constructivo, cu enfoke riba metanan comun.
