Diahuebs mainta 15 di juni, Minister Arends a sinta na mesa cu Raad van Toezicht y e directiva di SABA pa asina habri dialogo constructivo pa solucion duradero na bienestar general.
Pa algun siman caba e topico di e impasse entre Gobierno di Aruba y SABA a bin ta ricibi hopi atencion den nos comunidad. For di Ministerio a tuma e stapnan necesario pa duna splicacion ariba e situacion y a remarca cu ta enfocando riba solucion. Den Parlamento di Aruba un mocion a wordo presenta pa Minister haci esfuersonan pa bolbe reuni cu SABA y RvT. Durante e reunion por a tuma nota cu tabata tin un ambiente constructivo, cada partido a trece informacion dilanti pa asina profundisa riba nan perspectiva den dialogo positivo, segun un comunicado di gobierno.
E punto cardinal di e impasse ta e proceso di otorgamento di subsidio cu mester wordo haci manera ley ta stipula. E leynan aki ta rekeri un accountantsverklaring di e instancia cual ta trece siguransa riba e transparencia di uzo di fondonan publico
Minister Arends ta remarca cu e ta satisfecho con e reunion a bay y e tin tur confiansa cu lo haya un solucion pronto pero cu esaki lo rekeri esfuerso di tur dos banda.
Dialogo lo continua den e periodo binidero pa por yega na palabracionnan concreto entre Gobierno di Aruba y SABA pa locual ta trata e derecho di e trahadonan y tambe e servicio di cuido pa nos adultonan mayor, segun e comunicado ta finalisa.
