Gobiernonan tin e deber di informa nan pueblo activamente tocante nan maneho, na unda cu pa mehora y hisa e nivel di Transparencia Activo den gobernacion, minister di Integridad, Ursell Arends, a anuncia e lansamento di e proyecto piloto http://Publico.aw. caminda ciudadanonan por haya informacion gubernamental na un forma accesibel y innovativo.
Actualmente, riba http://Publico.aw por haya informacion di Ministerio di Transporte, Integridad, Naturalesa y Asunto di Adulto Mayor, incluyendo informacion tocante e funcionnan na diferente departamento, (huur di) edificio, rapport, proyecto di ley, documento di maneho y contestacion riba pregunta parlamentario.
E meta di Ministerio di Integridad segun a sigura ta pa sigui desaroya e plataforma aki y continuamente aumenta e cantidad y tipo di informacion, di tur ministerio, na un forma structural, riba e website regularmente lo tin updates y mas informacion.
Pero nan kier tende di e ciudadanonan mes y pa e motibo ey, si un persona tin sugerencia of comentario, por laga nan sa via e formulario di contacto riba http://Publico.aw. Asina nan por considera e feedback den e desaroyo di e proyecto aki.
“http://Publico.aw no ta solamente un plataforma; e ta un compromiso pa un comunidad informa y activamente envolvi,” manera minister Arends a sigura y tambe a agrega cu “nos ta invita tur ciudadano pa participa activamente den formacion di nos futuro transparente.”
E esfuersonan di Ministerio di Integridad pa promove transparencia ta parti di un enfoke mas amplio riba gobernacion efectivo y participativo. Transparencia no ta solamente informa pueblo, pero tambe ta facilita un conexion mas cercano entre Gobierno y ciudadanonan. Esaki ta crucial pa fomenta confiansa y colaboracion den desaroyo di nos comunidad. Pa e motibo ey nan ta invita tur ciudadano pa haci uso di e plataforma http://Publico.aw y participa activamente den e proceso di construccion di un Aruba miho informa.
Den un sistema democratico, tur persona tin derecho di pidi y ricibi informacion cu ta permiti participa den asuntonan politico y asina monitoria actonan di Estado pa sigura cu gestion publico ta transparente y responsabel y logra cu su accionnan lo coresponde na necesidadnan di e poblacion.
Sigur, esaki ta un bon iniciativa mirando cu pa hopi biaha, prensa ta haci preguntanan tanto pa mandatarionan, parlamentarionan y hasta directornan di departamentonan pa informa pueblo debidamente pero, poco biaha por haya contesta.
Pa esaki, redactor di Bon Dia Aruba a tira un bista riba e website na unda por a mira e cantidad di edificionan cu e ministerio aki ta encarga di dje, por ehemplo, nan tin 10 edificio eigendom y huur, comparti entre Bureau City Inspector, Bureau Integriteit Aruba, Departamento Transporte Publico, Directie Natuur en Milieu, Directie Scheepvaart Aruba y Inspectie Beveiliging Scheep- en Luchtvaart.
E gastonan pa luna di huurmento di edificionan aki ta ekivalente na 56.993.42 florin.
Rapportnan di ministerio tambe ta publico como por ehemplo, National Integrity System Assessment cual ta basa riba e Topico di Integridad y a ser realisa na Aña 2022; Public Transportation Demand and Supply – Delivering Service, basa riba e topico di Transporte y a ser realisa na aña 2022; y Coral Reefs Baseline Study for Aruba, e famoso rapport di Carmabi di aña 2019, entre otro rapportnan mas.
