Diaranson 1 di mei 2024, Minister di Transporte, Ursell Arends a tene un reunion importante cu mandatarionan di International Civil Aviation Organisation (ICAO). E reunionnan aki a sucede durante e evento di “Global Implementation Support Symposium”, cu a tuma luga na Republica Dominicana.
E evento aki, organisa anualmente pa ICAO, tin como meta pa stimula sosten, facilita programa pa desaroyo di capacidad, y promove desaroyo sostenibel entre su estadonan miembro.
Minister Arends, hunto cu funcionarionan di Departamento di Aviacion Civil di Aruba, a sostene un encuentro importante cu Sr. Juan Carlos Salazar, Secretario-General di ICAO, Sr. Christopher Barks, Director-Regional di ICAO pa Norte-America, Centro-America y Caribe, y tambe Sr. Jorge Vargas, Director di ICAO-CDI (Capacity Development and Implementation Bureau).
E encuentro a bay den un ambiente sumamente positivo y constructivo. A toca diferente tema di relevancia, manera e proceso pa converti Departamento di Aviacion Civil den un entidad autonomo cu su propio fluho di entrada, conectividad aereo den nos region, aviacion sostenibel, desaroyo di Aruba su sistema di transporte, ampliacion y modernisacion di Aruba su aeropuerto (gateway 2030) y tambe implementacion di identidad di biahero digital (“Digital Travel Credential”) a traves di e plataforma di Aruba Happy One Pass (AHOP).
Tambe a elabora riba e desafionan cu ta wordo encontra door di Aruba, siendo un isla chikito. Un di e desafionan aki ta e dificultad pa por haya personal cualifica pa trabaonan specialisa. Finalmente a papia di aliansanan y cooperacionnan cu Aruba ta haciendo uzo di dje pa asina complementa su trabaonan y pa por keda garantisa siguridad di nos industria di aviacion.
ICAO a keda masha contento y impresiona cu e update ricibi. ICAO a elogia Departamento di Aviacion Civil di Aruba pa e manera proactivo y dinamico con Aruba ta evolucionando su mes a pesar di tur e desafionan y retonan cu ta enfrentando, y a reitera cu e profesionalnan Arubiano ta gosa di un bon reputacion den e ramo internacional di aviacion.
Minister Arends a enfatisa di lo sigui cu e trabaonan cu actualmente ta wordo desplega, den e cuadro di acuerdonan cu a haci cu ICAO, y lo keda tene ICAO na altura di progreso. ICAO di su banda tambe a re-confirma cu lo brinda Aruba apoyo y sosten unda cu por.
