Our Ocean Conference ta un espacio crea pa dialogo di colaboracion entre e hefenan di estado, sector priva, sociedad civil y institucionnan academico pa discuti con por salba recursonan marino, promove uso sostenibel y educa publico en general tocante oceannan.
Our Ocean Conference ta tumando luga na Panama for di ayera 2 di maart te cu awe. Minister di Medio Ambiente, Ursell Arends ta participante den evento Blue Leaders, organisa pa Belgica pa asina ey habri e Our Ocean Conference cu e lema di e aña aki: “Nos Oceannan, nos conexion.”
E evento a busca na fomenta apoyo pa e tratado “Biodiversity Beyond National Jurisdiction (BBNJ)”, cu ta diseña pa proteha bida marino y recursonan den awanan internacional.
E evento di Blue Leaders a lansa un yamada pa tur pais pa “seal the deal” riba e tratado BBNJ, cu ta plania pa finalisa e aña aki, implementacion di e tratado ta esencial pa preserva salud y productividad di nos oceannan mundial, cu ta vital pa mantene bida riba e planeta, e meta ta pa logra proteccion riba por lo menos 30% di oceannan mundial.
Como participante na e evento, minister Ursell Arends a demostra e compromiso di Aruba, y di Reino Hulandes pa conservacion di nos oceannan y proteccion di bida marino. Synergia y ambicion pa esfuersonan cu ta crea resiliencia di recursonan y biodiversidad marino lo beneficia comunidadnan rond di mundo.
Our Ocean Conference ta enfoca riba seis area di accion pa protege y revitalisa e oceannan como por ehemplo, areanan di proteccion marino, Blue Economy sostenibel, cambio climatico, siguridad maritimo, piscamento sostenibel y polucion marino.
Ocean ta un di e recursonan mas valioso di humanidad, e cas di 80% di tur bida na tera y e proveedor di cuminda pa mas di 3 biyon hende na mundo, tambe un medio pa comercial mundial, sinembargo, esaki ta den peliger pa via di calentamiento global, practicanan no sostenibel, piscamento ilegal, contaminacion imprudente y perdida di bida marino.
Panama ta e prome pais centro Americano cu ta anfitrion di evento aki, loke ta pone importancia riba contribucion di Latino America pa conservacion marino y liderazgo mundial den realcion cu oceannan den ultimo añanan.
