Durante un conferencia ayera tardi, Aruba Waste Water Solutions (AWSS) a duna di conoce e plan tecnico di e trabaonan cu lo haci riba RWZI.
Pues esaki ta marca un momento historico ariba nos isla, pasobra pa decadas e problema di awa preto ariba Aruba a keda sin wordo atendi adecuadamente. E sistemanan di purificacion cu ta funciona ariba nan capacidad ta un menasa directo riba nos sector turistico, nos medio ambiente y nos economia. Despues cu e ley a pasa pa delega e maneho di e plantanan aki na un entidad priva, a move lihe pa por realisa e prome stapnan di e compania recientemente forma, segun un comunicado di gobierno.
Awo AWSS ta conta cu un ekipo capacita cu ta cla pa ehecuta un di e misionnan nacional mas importante den nos historia. Ministerio di Naturalesa, conhuntamente cu Ministerio di Energia y Asuntonan General a haci esfuersonan grandi pa por yega na unda cu nos ta awe, ta desea AWSS hopi exito cu nan tarea. Minister Arends ta duna un danki special na señor Jossy Figaroa kende a lidera e comision encarga cu e privatisacion di RWZI. Ademas, ta gradici Marlon Croes y Ton Rojer cu a traha incansablemente pa por a logra esaki.
Segun e comunicado, e paso cu a tuma ayera siguramente ta un di e logronan mas importante di Gabinete Wever-Croes II. E colaboracion interministerial pa cu e solucion di e problematica di RWZI tabata uno clave. Ministerio di Naturalesa tambe ta gradici colega Minister President Evelyn Wever-Croes y Glenbert Croes pa esaki y pa brind’e e confiansa pa por a lidera e esfuersonan eherci.
