Comercio internacional ta sosode pa casi 80% den sector maritimo. Esaki ta contribui alrededor di 400 biyon dollar na economia mundial. Aruba mester tin un participacion mas grandi den e totalidad aki. Esaki ta e vision di Minister Arends pa sector maritimo. Desde aña pasa Gobierno a tuma varios paso pa logra cu Aruba ta yega na un presencia mas fuerte den e sector aki.

Durante e ultimo lunanan e fundeshi pa un sector maritimo fuerte a cuminsa haña forma. Den prome etapa mester a establece contacto cu diferente instancia internacional grandi cu ta activo den e sector. Asina a amplia contacto cu instancianan di gobierno Mericano y Hulandes. Alabes a busca partners den sector priva local, y tambe e sector priva Mericano y Hulandes. A pone e prome bon base pa e cooperacion cu ta necesario pa logra expansion di e presencia di Aruba den e sector maritimo.

Den e cuadro aki a ricibi dia 10 di augustus un delegacion di sector priva Hulandes den forma di e vereniging cu ta representa doñonan di barco na Hulanda. Esaki ta KVNR, Koninklijke Vereniging van Nederlandse Reders. Pa KVNR, a participa nan managing director Sra. Annet Koster y e hurista di KVNR Sr. Lodewijk Wisse. E instancia aki tin como miembro companianan di renombre y reputacion halto cu ta representa casi 2400 barco grandi. Mayoria di e barconan aki ta nabega bou bandera Hulandes.

Un paso grandi pa Aruba den sector maritimo ta pa activa e registro di barco di Aruba. Den Reino tin tres registro, esta Hulanda, Curaçao y un registro di Aruba cu pa cierto motibo no ta activo. Vision di Minister Arends ta pa re-activa e registro di Aruba, cual ta un registro di Reino, y ta algo cu KVNR a mustra nan interes pa Aruba desaroya esaki na un forma moderno y eficiente. Cu esaki lo expande e sector maritimo cual na su turno tin efecto directo den economia di Aruba pasobra e barconan riba lama depende di logistica for di tera. Logistica den termino di material y tambe diferente aspectonan legal y financiero.

Minister Arends a indica sin embargo cu ela pidi sector maritimo den su cartera pa motibo cu e ta un sector critico pa Aruba pero cu lastimamente no ta hopi hende ta comprende esey y durante añanan ela wordo grandemente neglisha. Lastima di esaki ta cu e recursonan disponibel ta hopi limita y pa logra re-activa e sector lo mester traha na un forma creativo. Parti di e solucion ta pa Aruba traha den cooperacion cu e otro islanan. Tur isla y Hulanda lo por probecha di e ‘economies of scale’ cu un cooperacion asina ta trese cu’ne. P’esey ta masha importante cu havenmeester di Boneiro, Sr. Gunther Flanegin a facilita e reunion aki y a participa tambe hunto cu KVNR y Gobierno di Aruba.

Durante su bishita na Ocean Conference, Minister Arends a palabra cu Minister Harbers di Hulanda (Infrastructuur en Waterstaat), cu Aruba lo aprecia pa Hulanda comparti conocemento entre otro riba e tereno aki. Aruba ta preparando e fundeshi pa un sector maritimo fuerte y ta conta riba cooperacion di Hulanda pa logra esaki.