Diabierna ultimo minister di Transporte, Integridad, Naturalesa y Asuntonan di Adulto Mayor demisionario, Ursell Arends, a tene su ultimo conferencia di prensa. Durante e conferencia e mandatario a duna un actualisacion tocante e situacion financiero di Serlimar, a indica con bou su mandato a mehora esaki y tambe a mencion kico ta e stapnan, y deseonan como minister saliente, pa e gobierno nobo tuma pa sigui mehora e compania su funcionamento.

Minister Arends a splica cu e meta cu nan ta laga estableci pa Serlimar ta pa reduci e DVO y e contribucion di gobierno, y mehora e deficiencia financiero te cu cero. El a indica cu e compania a mutrsa di por genera suficiente entrada riba su mes y a remarca cu si sigui riba e mesun caminda e DVO lo ser elimina y e contribucion di gobierno lo bira cero.

Otro aspecto cu el a menciona cu ta importante pa siguiente gobierno tene cuenta cune den futuro ta trata e cantidad di empleadonan. El a indica cu si no atende cu aspecto aki e ta bira dificil pa e compania opera sin perdida financiero. El a enfatisa cu mester tuma mas medida pa mehora e eficiencia y aumenta e ingreso y crea un compania cu ta consisti di un tipo di empleado.

E mandatario tambe a indica cu a base di calculacion tin dos oportunidad pa genera ingreso adicional pa e compania. El a splica cu a traves di entradanan di clientenan comercial, a traves di cual Serlimar ta bay ta mas proactivo y mas competitivo den e aspecto comercial; y e di dos ta pa optimalisa e cash flow via mehoracion di e proceso di cobransa di clientenan residencial. El a remarca cu den e dos aspecto aki ta calcula cu Serlimar por genera cinco miyon florin adicional.

El a agrega cu sinembargo mescos cu e posibilidadnan aki, por spera cu Serlimar por logra un nivel di autosuficiencia sin otro intervencion. “Mester zorg pa logra e dos aspectonan aki pa asina e compania por ta autosuficiente y sigui dal stapnan positivo pa dilanti,” el a indica.

Pa loke ta decisionnan cu mester ser tuma, el a splica cu riba termino mester determina con ta bay cubri e deficiencianan cu tin y e posibilidadnan presenta pa e Conseho di Supervision di e compania pa esaki ta pa introduci un Extended Producer Responsability (EPR). El a indica cu pa fin di maart 2025 un estudio ta ser termina conhutmanete cu Impact Blue y University of Georgia cu lo encamina e proceso con pa logra esaki.

“Sushi cu ta ser crea ta e doño ta esun cu ta produci esaki y nos mester ta honesto, tur loke ta importa tambe ta bin cu desperdicio y esaki ta manera con via e EPR ta con lo por paga pa procesa e desperdicionan aki,” el a bisa.

Minister Arends a sigui splica cu un di e proposicionnan di e Conseho di Supervision tambe ta kizas pa fusiona e compania Serlimar hunto cu AWSS, cual dialogonan pa esaki ta andando y ta spera cu por continua.

Den ronda di pregunta miembro di prensa a puntra e mandatario con ta sigura cu stapnan pa Serlimar sigui mehora ta continua cu e futuro gobierno y cu loke a yega di sucede den pasado cu e compania no bolbe ripiti den futuro.

Minister a splica den su contesta cu un di e pilarnan strategico cu a enfoca riba dje ta pa bin cu cambio den e ley di Serlimar. El a sigui splica cu landsverordening Selrimar ta data di 2005, y conhuntamente cu Conseho di Supervision y gerencia a traha riba un lista di cambionan cu nan kier mira den e ley aki.

El a agrega cu tambe tin e ley di corporate governance cu ta den su trayectoria formal pa yega sala di parlamento. El a remarca cu esaki tambe lo preveni cu e metementonan cu a yega di tuma luga den pasado no por tuma luga mas. “Nos sa caba kico a pasa den pasado, p’esey no por permiti cu pushi ta bay cuida pisca. Ta nos tarea tambe pa wak, pa garantisa cu loke a pasa den pasado no bolbe ripiti,” el a subraya.

Pa loke ta e proyecto di Baki den Bario, miembro di prensa a puntra e mandatario si e tin deseo pa mira e proyecto aki continua den e futuro gobierno, na cual e minister a indica cu “sigur u si”. El a splica cu e proyecto aki ta uno cu ta facilita e pueblo e manera pa deposita su desperdicio den un forma separa.

El a agrega cu mientras tanto como pais lo mester sigui traha pa yega na e separacion di desperdicio pa esaki por ser procesa y crea materia prima cu por ser usa localmente of cu por ser exporta.

“Como minister saliente di naturalesa esaki ta un proyecto cu sigur mi lo kier mira continua pa asina duna e pueblo un oportunidad, un espacio unda nan por trece nan desperdicio y tin esaki separa pa e por ser procesa,” el a remarca.

Ademas, e mandatario a indica cu como minister saliente e ta laga tambe den e parti di overdracht cu nan kier mira un parke circular caminda tur dia e ta bay ta habri pa ciudadanonan trece nan desperdicio di un forma separa y contribui pa trece un cambio di mentalidad tocante con ta anda cu desperdicio na Aruba.

Por ultimo, contestando pregunta tocante su tempo como mandatario y si tin un reflexion riba esaki, el a expresa cu na momento cu el a asumi e responsabilidad como gobernante, e tabata consciente cu e ministerionan cu el a crea no ta bay rekeri di dje pa tuma decisionnan cu no ta bay ta facil y decisionnan cu kizas no ta hende ta bay ta contento, pero como gobernante, el a remarca, “mi no t’ey solamente pa haci hende contento, mi t’ey pa tuma decisionnan cu ta na bienestar general.”

“Mi ta sali cu cara na laira mirando cu mi ta laga e pais aki den un mihor situacion financiero, nos naturalesa cu e derecho y respet cu e merece, y mas cu tur cos, cu mi a tuma decisionnan cu ta faborece e proximo generacion. Esey ta loke mi a bin pa haci y mi ta satisfecho cu mi tareanan cu mi a haci. Mi no ta perfecto, mi a haci erornan y di e erornan ey tambe mi ta siña pa den un proximo gabinete, cu e confiansa di comunidad atrobe, mi lo por regresa pa sigui traha riba e trabounan, e fundeshi cu nos a crea,” el a enfatisa.