Gobierno di Aruba lo introduci un maneho nobo pa regula y reduci e permisonan di Utility Task Vehicles (UTV) y All-terrain vehicles (ATV).  E maneho tin como meta pa mitiga e impacto desastroso pa nos naturalesa, e molester na habitantanen y e siguridad di e usuarionan y Aruba su bishitantenan. 

Ya pa varios aña ta purbando di yega na un miho balans entre turismo aventurero y proteccion di naturalesa. E uso di UTV y ATV a trece un aumento di accident cu daño fisico y material, daño na nos naturalesa (flora, fauna y propiedadnan geo-morfologico), disturbio pa ciudadanonan (zonido y stof) y obstaculisacion di e fluho di trafico.

Gobierno di Aruba a instala un comision multidiscipliniario y un taskforce pa controla cumplimento di ley y reglamento relaciona cu vehiculonan di motor cu ta ser usa pa huur. A reduci caravana na solamente 10 vehiculo, pero esaki no ta suficiente.

Ministerio di Naturalesa y Transporte ta hiba un maneho di regula y reduci e permisonan pa opera e vehiculonan UTV y ATV den transporte publico. A base di consehonan ricibi di Directie Natuur en Milieu y Departamento di Transporte Publico, den cooperacion cu e instancianan cu a forma parti di e comision di conseho, lo introduci diferente cambio, entre nan rutanan alternativo pa UTV y ATV den transporte publico, pa minimalisa e disturbio den nos naturalesa.

E regulacion nobo lo resalta e compromiso di Gobierno di Aruba pa balansa turismo cu proteccion di naturalesa. Conservando y protehando nos areanan natural di vehiculonan di motor ta duna balor na nos ecosistema y economia.

Destruccion causa pa UTV y ATV
Den pasado, ciudadanonan y organisacionnan ambientalista regularmente a pidi atencion pa e destruccion y molester causa pa e tipo di vehiculonan aki. Entre otro, NGO Aruba Birdlife Conservation (ABC) Foundation regularmente ta trece dilanti nan preocupacionnan pa proteccion di medio ambiente, como tambe casonan unda naturalesa y animalnan ta sali perhudica. Luna pasa, e fundacion a indica cu den luna di juni, shoconan a encontra diferente dificultad. Tres a muri di veneno, un a muri durante mantenemento di caya y dos a ser golpia pa vehiculo. E NGO ta remarca cu esaki ta solamente e casonan cu nan ta na altura di dje y cu pues e cifra di mortalidad ta probablemente mas halto pasobra no tur caso ta ser comparti cu nan.

E tema di uso di vehiculonan di ATV y UTV ta uno cu keda un punto di atencion den comunidad, specialmente pa activista- y fundacionnan manera ABC cu ta lucha na bienestar naturalesa di Aruba. Den luna di april ultimo mes e conocido activista Greg Peterson a publica cu otro tipo di parha na Aruba, e Patrishi, a disparce di un area hopi frecuenta pa e parha pa motibo di e actividad turistico di UTV y ATV.

E activista, como diferente otro instancia, a remarca na varios ocasion cu pa motibo di e actividad di UTV y ATV, cu ta baha for di caminda, ta haci un impacto serio riba naturalesa di Aruba y ta importante pa regula esaki hopi antes cu e causa mas daño na Aruba su flora y fauna.

Na luna di maart, mediante un video publica ariba su pagina di Facebook, Sr. Greg Peterson a mustra con e guianan turistico ta mustra e turistanan con pa haci “spinning” cu vehiculonan ATV. Mientras cu e turistanan tambe ta purba haci esaki na e mesun sitio y despues e actividad ta bolbe ripiti cu e siguiente grupo di turista na e mesun localidad.

Peterson ta remarca cu antes tabatin 13 nido di shoco riba e tereno aki y aworaki no tin niun.

El a indica cu antes tabatin hopi Patrishi tambe riba e tereno aki, aworaki tampoco no tin niun. Tur esaki debi na e destruccion cu e vehiculonan aki ta causa. El a remarca cu e stof di e “spinning” cu e turistanan ta haci no ta bay solamente riba e casnan bunita na Tierra del Sol y cercania, pero tambe e ta bay den e awanan di costa den e area ey.

Y na augustus di aña pasa, e grupo di Facebook Stop UTV Tours Aruba a comparti un suceso lamentable involucrando un vehiculo UTV. E caso aki, a publica un potret di un coneu cu a perde su bida pa motibo di un di e vehiculonan aki.

“Trinta aña pasa, e coneu (cottontail) tabata bula rond den mi cura. E ultimo cinco individuo cu mi a mira tabata exactamente manera esun aki ayera: den panico completo trapa pa un grupo di UTV,” un usuario a post riba e pagina di Facebook. “E actividad ridiculamente destructivo di off-road aki ta causando un reduccion skerpi den especienan di flor y fauna, sin menciona e accidente, perdida di man y pia, y e consecuencianan financiero pa AZV.”