Ministerio di Naturalesa recientemente a publica un “Blueprint” cu ta indica tur e diferente localidadnan posibel pa deposita desperdicio, y lo sigui amplia e lista aki cu tempo – incluyendo mas y mas compania pa forma parti di e solucion.
Ya for di algun aña Serlimar mes no ta dump na Parkietenbos mas, pero na Ser’i Teishi. Na e facilidad di Ecotech tin ploeg cu ta separa desperdicio pa asina “rescata” mas hopi posibel di ser tira afo. Loke no por reuza of bende, ta ser compacta y deposita den un forma organisa – esaki den contrast cu benta tur cos abiertamente, y kima cierto desperdicio den aire liber manera tabata tuma luga na Parkietenbos.
Pakico cera Parkietenbos si infrastructura pa desperdicio no ta 100% cla?
E facilidad di Ser’i Teishi ta considera un Dump Sanitario (“Sanitary Landfill”). Esaki den comparacion cu Dump di Parkietenbos, cu ta un Dump Controla (“Controlled Landfill”). E diferencia grandi ta den e falta di eficiencia di un dump controla, pa motibo di falta di separa, compacta, y stiwa sushi na un manera responsabel. Esaki ta considera e solucion mas factibel a corto plaso – pa redirigi desperdicio for di Parkietenbos, y asina cuminsa e proceso duradero pa amplia e industria local di coleccion y procesamento di desperdicio.
Cualkier solucion cu no ta incera “open dumping” y “open burning” ta un paso den e bon direccion, y ta representa un salto grandi pa Aruba. Esaki ta un di e principionan cu Minister Arends a splica, cu un Sanitary landfill (manera Ser’i Teishi) ta un paso den e bon direccion a corto plaso – cual no mester descurasha nos di ambicionnan a largo plaso, manera e.o recicla, reuza, of minimalisa uzo di cierto materialnan. Tambe mester pone e fundeshi pa stimula un economia circular caminda ta preveni desperdicio por completo.
Tambe mester ser recorda di e miyones di Florin di boet cu Land Aruba ta enfrenta si NO logra cera e dump di Parkietenbos na tempo.
Aruba su infrastructura di desperdicio ta den fase di infancia, y maneho optimal di desperdicio ta solamente na su inicio. E infrastructura pa un economia circular, pa tin industria amplio di reciclahe etc. ainda no ta na su luga debido – pero gobierno a traves di ministerio di naturalesa ta trahando pa stimula e industria. No obstante, ya caba Aruba tin suficiente opcion pa por cuminsa e transicion pa redirigi varios tipo di desperdicio, y desaroya un industria robusto cu debido tempo.
Lo tin mas opcion den futuro cercano na caminda pa hiba otro tipo di desperdicio, cu e meta cu e companianan aki lo recicla mas tanto posibel. Desaroyo di nos maneho di desperdicio optimal ta simplemente na su inicio, pero ta un caminda cu nos como pais mester encamina.
