Minister Ursell Arends lo ricibi distincion di su alma mater

Segun un relato di portal noticiero Windsor Star, vice-prome minister di Aruba y minister di Transporte, Integridad, Naturalesa y Asuntonan di Adultonan Mayor, Ursell Arends ta entre seis alumni di St. Clair College cu ta bay ricibi un distincion for di e institucion academico.

Ademas di minister Arends, un wrestler profesional, un lider sindical y un locutor di radio ta entre e recipientenan di e di 31 Premio Alumni di Distincion di St. Clair College, na Canada.

“Loke semper ta conmovedor tocante nos Alumni di Distincion no ta djis e exito fenomenal cu nan a disfruta den nan bida profesional, sino tambe con nan a pasa nan conocemento y habilidadnan como mentor pa sostene e exito di otronan y duna servicio valioso na nan comunidadnan den maneranan cu no ta relaciona cu nan ocupacion,” segun presidente di St. Clair College, Patti France. “Realmente nan ta e miho embahadornan di Saints Nation y tur loke e ta para p’e, academicamente y den sentido di servicio pa comunidad.”

Incluyendo e seis persona cu a ricibi e honor e aña aki, e scol a reconoce 137 graduado a traves di e programa Alumni di Distincion desde 1992.

E ganadornan pa 2024 ta inclui presidente di Unifor Local 444, David Cassidy, kende a gradua di e programa di mantencion di construccion electricista na 1991. E ta ricibiendo e honor den categoria Apprenticeship.

Ursell Arends, vice-prome minister di Aruba, ta bay ricibi e premio pa categoria Business and IT. El a gradua for di e programa di international business na aña 2005.

Dan MacDonald di CKLW Radio Bell Media Windsor, kende a gradua di programa di periodismo di e scol na aña 2002, ta ricibiendo e honor den categoria di Media Art and Design.

Presidente y CEO di Aarkel Group, Larry Delaey, kende a grauda na 1989 di e programa di moldmaking technician, ta bay ricibi e premio Tecnologia/Ingenieria.

Chauouki Hamka, lider comunitario pa e MADD (Mothers Against Drunk Driving) pa Windsor/Essex y agente coreccional na Centro di Detencion South West, ta siendo honra den e categoria di Estudionan di Comunidad. Hamka a gradua di e programa di administracion di ley y seguridad na aña 2009.