Siman pasa na Scol Practico pa Ofishi (SPO) Santa Cruz a tuma luga e reapertura di nan green house, “Hofi Pal’i Siya Cora”, un proyecto cu a ser realisa bao guia di meneer Randolph Fingal hunto cu studiantenan di SPO Santa Cruz y cu sosten di diferente perosna-, organisacion- y instancianan.

Segun Fingal mes a splica anteriormente e green house di SPO Santa Cruz ta uno cu ya caba ta yegando 10 aña di existencia y e tabata den un estado di necesidad pa haya mantencion.

Ayera mainta Minister di Transporte, Integridad, Naturalesa y Asuntonan di Adulto Mayor, Ursell Arends, a bishita SPO Santa Cruz y a haya un recorrido di e proyecto Hofi Pal’i Siya Cora

Durante su bishita Minister Arends a anuncia, conhuntamente cu directora di Santa Rosa, cu nan lo otorga un proyecto di micro hydroponics pa SPO Santa Cruz. Esaki cu e meta, el a remarca, pa fortifica e relacion di cooperacion di mas 20 aña cu tin entre SPOr Santa Cruz y Santa Rosa.

El a sigui splica cu den e comienso di e aña escolar nobo un persona encarga, conhuntamnte cu e studiantenan ta bay arma esaki y alabes ta bay train tur e maestronan pa nan tambe sa con pa traha e sistema.

Di e forma aki, el a enfatisa, nan ta sigui engrandece e sector primario den su totalidad y mirando cu SPO Santa Cruz tin agricultura, y tambe e parti di cria di bestia den nan curriculum, e proyecto di microhydroponics por fortifica esaki y sigui engrandece e sector di agricultura a traves di SPO Santa Cruz.

“Esaki ta loke nos kier logra cu e colaboracion y mi ta spera cu e sistema di microhydroponics por haya bon uso tambe y sigui tecnologia den e scolnan pa loke ta trata agriculutra,” Ministrer Arends a bisa.

Pa loke ta trata expansion pa realisa proyectonan manera esun di e green house di SPO Santa Cruz na otro scolnan, minister a splica cu nan a caba di finalisa e Dutch Caribbean Agriculture Visioning Process caminda tur seis isla den reino a bin hunto y a firma un MoU (memorandum di comprondimento) y na final di e MoU a agrega un anexo cu ta señala cinco punto strategico cu gobierno ta bay colabora riba dje y un di nan ta netamente pa introduci ‘school gardens’ (jardin escolar) y introduci agricultura den scolnan.

El a menciona cu na Princes Amalia School a traha caba un ‘agroforestry’ hunto cu EcoLiving y Santa Rosa unda a crea un sistema nobo di cultiva , ‘Ban Planta Awa’. Minister Arends a ratifica cu durante e aña escolar nobo lo haci esaki na varios otro scol tambe pa sigui stiumula agricultura den nos scolnan.

“Mi ta kere cu SPO Santa Cruz ta haciendo un tremendo trabao y mi ta kere di nos banda nos lo sigui aporta y facilita pa nan por engradece esaki tambe,” el a subraya.

Minister Arends a indica cu aworak cu e ta bezig cu diferente proyecto pa stimula agricultura macro y un di e proyectonan aki tabata e AGRI Business Academy. El a agrega cu den transcurso di lunanan proximo nan ta bay lansa tambe e Agrofund y tur esaki, e minister enfatisa, ta manera con nos ta stimula agricultura y e pasa di ta un hobby pa haci esaki den un negoshi organisa.

Elo a subraya cu pa por yega na e caminda cu por alimenta e hendenan, e ta bay rerkeri inversion. Esey, el a señala, ta un di e puntonan cu tabata haci falta. Segun e minister a informa Den e rapport di World Bank a identifica cinco obstaculo y financiamento tabata un di nan y di e forma aki nan ta cubri e obstaculo aki y sigui stimula agriculutra.

“Mi ta kere una bes tin financiamento cu e hendenan aumenta proporcionalmente nan negoshinan, e ora nos ta bay yega na e caminda unda nos kier. Limita importacion. Na e momentonan aki casi 99% di loke hende ta come na Aruba ta wordo importa y poco poco nos ta cuminsa baha e porcentahe aki pa cosnan cu nos ta cultiva localmente.

Esey ta e vision di gobierno di Aruba, e mandatario a indica. Un punto importante cu el a menciona ta segruidad di alimentacion. El a recorda cu den e transcurso di pandemia esaki ta un di e puntonan cu como mundo tur hende por a si ñfor di dje y Aruba no por keda atras.

“E vision ta cu pa 2025 nos por yega na 15% di seguridad di alimentacion. Nos tin un trabao duro nos dilanti pero mirando con sector priva tambe ta colaborando, nos ta bay logra esaki,” el al a remarca.

El a splica c na Aruba tin un comision cu ta lidera pa Santa Rosa cu ta trahando riba un GAP (Good Agriculture Practice) pa por yega na un certificacion di rekisitonan cu e agricultornan mester cumpli cune ora ta produci fruta y berdura. Aworaki, segun el a bisa, tur e productonan cu ta wordo importa cu ta drenta Aruba no tin ningun tipo di certificacion.

Cu esaki, Minister Arends a reslta, nan ta eleva e nivel di produccion pa e hendenan local, pero tambe nan tin cu bay cuminsa rekeri esaki di tur cos cu drenta e isla. “Di e forma aki nos por garantisa cu loke ta drenta di berdad ta alimenta nos y no ta causa daño na nos salud. Esaki ta manera cu nos ta organisando sector primario den su totalidad y mi ta kere na final di dia e ta bay refleha den salud di nos hendenan y tambe riba e gasto cu ta wordo poni riba AZV,” el a finalisa.