Comunidad a keda sacudi un biaha mas recientemente na momento cu Ministerio Publico a anuncia cu a yega na un acuerdo cu un persona acusa di ta un ‘ambtenaar spirito’ den gobierno. Esaki a pone enfoke riba e tema di integridad y corupcion den aparato publico di Aruba, y como minister di Integridad, Ursell Arends tambe a pronuncia su mes riba e asunto.

“Contrario na e pensamento cu por tin, integridad no ta un virtud solamente reserva pa Gobierno of structuranan administrativo,” Arends a expresa den un comunicado di prensa. “Integridad ta extende su influencia riba cada hende individualmente, mehorando nan bida y contribuyendo na e nivel di integridad di un sociedad.” Minister Arends ta enfatisa cu e forsa di cualkier sociedad ta depende ariba e accionnan di su hendenan.

Un corelacion crucial cu e Minister ta adresa ta e relacion entre integridad y corupcion. Den discursonan publico, hopi biaha ta papia di corupcion politico, unda ta reduci e confiansa den e aparato gubernamental y politica na Aruba en general. Minister Arends ta boga pa reenforsa e medidanan anti-coruptivo na tur nivel pa restaura confiansa den Aruba su institutonan.

 

Un di e ehempelnan unda mester reenforsa medidanan ta e uzo prevalente di contratonan DVO/OVO pa entidadnan di Gobierno pa haci acuerdo pa pagonan regular como compensacion pa servicio y trabao. E contratonan aki, originalmente a wordo diseña pa adkeri servicionan specifico den termino defini. E contratonan aki den transcurso di tempo a bira manera un substitucion di un acuerdo di empleo riba termino cortico y mediano. E diferencia entre un DVO y contract di trabao ta cu DVO no tin elementonan contratual manera trabaonan defini, maneho di recursonan, termino di trabao of criterionan pa evaluacion di prestacion.

Debi na ausencia di mecanismo di control y criterionan obhetivo pa evalua contenido, calidad y otro factornan, autoridadnan di Gobierno no por midi efectivamente e prestacion di e proveedo di servicio, pone nan responsabel ni exigi cumplimento. Esaki ta crea un obligacion unilateral for di parti di Gobierno cu ta rekeri asignacion di fondonan publico sin consideracion ariba e calidad di contribucionnan.

Pa sigura e uso responsabel di fondonan publico, Minister Arends a presenta richtlijnen pa regula y preveni mal uso di e tipo di contratonan aki. E ‘Richtlijnen voor het aangaan van overeenkomsten van opdracht’ a wordo aproba den ministerraad desde 4 di november 2022 y ta valido pa tur ministerio. Minister Arends a pone nan ter inzage den Parlamento durante tratamento di Presupuesto 2023 na November aña pasa.

Ora ta trata di un contrato coruptivo tin dos partido envolvi, e dunado di contrato y e tumado di contrato. Pues ta subraya cu de facto integridad ta un responsabilidad tanto colectivo como individual, na unda no tin ley of regulacion, cada persona tin e responsabilidad pa consulta cu su mesun compas moral y dicidi si loke e ta haciendo ta algo corecto, integro of no.

Pa resumi, Ministerio di Integridad ta comprometi pa promove integridad den e aparato gubernamental y su influencia directo riba e sistema colectivo. Pa aborda e relacion entre integridad y corupcion, Ministerio ta tuma como meta pa mehora e nivel di integridad den nos comunidad y proteha recursonan publico.