E hecho cu e comunidad Arubiano a conoce diferente desaroyo riba tur sorto di area ta danki na esfuersonan, sodo y lagrimanan di adultonan mayor. Generacion pa generacion, nan a bin ta construi e fundeshi cu awe Aruba ta disfruta di dje. ‘Nos grandinan’ merece un luga special den nos comunidad, un luga unda nan por disfruta ampliamente di e apoyo y sosten di e comunidad.

Dialuna 15 di mei a tuma luga e reunion publico den Parlamento di Aruba pa trata subsidio di casnan di cuido, specialmente aclara e ponencia incorecto di oposicion unda ta bisa cu tin recorte den subsidio ricibi door di Stichting Algemen Bejaardenzorg Aruba(SABA).

Minister a cuminsa na informa Parlamento di Aruba riba e investigacion conduci riba SABA su maneho desde e introduccion di subsidieverordering na 2017 pa 2021. A pone e resultado di e investigacion ter inzage pa Parlamentarionan mes wak e cifranan cu tin y mas importante, e cifranan cu falta ora ta papia di fondonan publico.

SABA ta e fundacion cu ta haya mas subsidio for di Gobierno y te cu awo Gobierno no ta ricibiendo jaarrekeningen cu accountantsverklaring mane ley te prescribi, pa por tin bista di con ta uza e fondonan aki. Pues den otro palabra, no tin bista con fondonan publico ta wordo uza.

Cantidad di cliente interna na SABA ta baha cada aña pero e subsidio di Gobierno no ta baha. SABA ta ricibi alrededor di 9.216 mil florin pa luna pa cada cliente, for di Gobierno.

E investigacion a evalua e efecto di cantidad di cama riba gastonan y efecto di esaki riba personal, y ta indica subida substancial di gastonan sin argumentacion of responsabilisacion.

SABA mester aclara con a uza fondonan publico pa operacion, pero tambe pa construccion na San Pedro di Verona, y implementacion di VU-regeling.

E esencia ta cu tin total 620 persona cu tin mester di cuido. Casnan di cuido priva tin 250 cliente, SABA ta ricibi 200 y tin un lista di espera di 170 persona. Cu e accion unilateral di SABA pa cera cama, esaki ta nifica cu pa 26 adulto mayor na e momentonan aki no tin accesibilidad na cuido. E decision aki ta contra e vision di Minister Arends y contra e necesidad creciente di cuido pa adultonan mayor. Gobierno di Aruba a sinta varios biaha na mesa cu Raad van Toezicht y gerencia di SABA y lamentablemente na e mesun mesa aki, Raad y gerencia a scohe pa haci politica di e situacion grave aki y bai corte.

Trahadonan ni clientenan di SABA no ta culpabel den e caso aki y nan no por sali perhudica pa falta di cuplimento di gerencia den e administracion di 22.5 miyon florin di fondo publico.

Na e momentonan aki ta den fase pa busca un solucion. Despues di un periodo di casi 7 luna di e stukkenonderzoek, ta sondeando posibilidadnan na unda por yuda garantisa cuido na tur nos adulto mayornan cu e necesidad di cuido, como tambe pa por ofrece un calidad di cuido adecua.

E meta ta pa traha na bienestar di nos adultonan mayor. Nan merece esaki y nan tin derecho riba cuido di calidad. “Mi ta visualisa un Aruba unda e cuido di nos adultonan mayor ta ancra den nos deber moral y ta wordo reenforsa door di un maneho solido, unda tin servicio di cuido y iniciativanan adecua. Un implicacion importante pa esaki ta pa logra un distribuimento balansa di costo y responsabilidadnan,” Minister Arends ta termina.