Dutch Caribbean Agro Visioning Process
Santa Rosa y Minister di Naturalesa, Sr. Ursell Arends ta liderando un iniciativa pa promove e potencial di sector primario na Aruba y mehora siguridad di alimentacion den Reino Hulandes. Como parti di e esfuerso aki ta organisa e conferencia Dutch Caribbean Agro Visioning Process, uniendo Gobernantenan di hermana islanan Corsou, Boneiro, Saba, St. Eustasius y St. Maarten. E evento tin como meta pa fortifica lasonan y crea un plan concreto pa cooperacion den e sector primario.
E conferencia agricola lo toca diferente tema entre otro miho practicanan, posibilidadnan financiero pa sostene agricultornan, evaluacion di maneho existente y esfuersonan pa inculca balor pa agricultura, pa medio di programa escolar cerca nos muchanan. Door di comparti experiencianan y conocemento, e dignitarionan y participantenan ta busca strategianan innovativo pa duna sector primario un empuhe.
E Ministernan y representantenan bishitando Aruba lo haya un recorido di varios proyecto di sector primario. Esaki ta inclui un bishita na e proyecto escolar di agroforestry na Prinses Amalia Basisschool, cria di cabrito y apicultura, esta cuido di abeha. Ademas, lo haya e oportunidad di conoce tecnica innovativo di hidroponico y introduccion di especie hibrido di pitaya.
E conferencia lo culmina dia 2 di juni 2023 cu un acuerdo pa e implementacion di un plan di accion pa cooperacion entre e islanan den Reino, cu un enfasis riba siguridad di alimentacion. E acuerdo lo sirbi como un guia pa futuro esfuersonan den cada Pais pero tambe pa colaboracion entre islanan.
Aunke e evento ta limita pa dignitarionan y representantenan, e resultadonan di e conferencia lo ser presenta y discuti cu cunukeronan y stakehoders local. Den e manera aki por haya e punto di bista di agricultornan, segurando cu esfuersonan colectivo ta alinea cu e necesidadnan di e sector primario y tumando decisionnan inclusivo. Hunto por tin crecemento pa medio di colaboracion.
Minister Ursell Arends ta extende su gratitud na Santa Rosa pa e coordinacion di e conferencia pa asina promove e futuro di agricultura na Aruba.
