Recientemente a traves di un comunicado di prensa, vice-minister president, Ursell Arends a comenta riba e manifestacion pro-famia tradicional organisa pa lidernan religioso cu a entrega nan manifesto dilanti bestuurskantoor.

“Muestra bibo di nos democracia ta den e derecho igual di tur hende pa manifesta nan opinion y sentimentonan na Pais Aruba. Ta netamente e mesun derecho igual aki ta locual ta den discusion. Gobierno di Aruba tin e tarea di scucha su ciudadanonan y na mes momento garantisa cu derechonan universal di cada ser humano ta wordo honra. Cada persona den Gobierno y Parlamento a priminti di sirbi nos pais respetando nos constitucion.”

 

Manera ta conoci, Parlamento lo trata e concepto di ley pa haci matrimonio entre pareha di mesun sexo posibel. Gobierno ta siguiendo e desaroyo aki di cerca y ta scuchando diferente opinion for di pueblo.

Riba dia 10 di november proximo, Corte Supremo lo considera e apelacion di gobiernonan di Aruba y Corsou contra e decision cu ta obliga nan habri matrimonio pa parehanan di mesun sexo. E audiencia lo ser pasa via un livestream.

E caso aki ta trata si Corsou y Aruba ta obliga permiti parehanan di mesun sexo casa, sigurando derechonan igual. Corte Comun su veredicto a determina cu esaki berdaderamente ta e caso. E caso legal cu ta concerni e apertura di matrimonio na parehanan di mesun sexo a ser originalmente inicia pa Human Rights Caribbean Foundation y Fundacion Orguyo Aruba.

“Como vice-minister president, representando Gobierno di Aruba, mi por bisa cu mescos cu den comunidad, den e gabinete por tin diferente pensamento individual riba e tema di matrimonio entre pareha di mesun sexo. Pero manera nos Minister President a indica den su discurso na Den Haag, Pais Aruba ta boga y lo sigui boga pa igualdad pa hende muhe, e comunidad LBGTQIA+ y tur otro grupo marginalisa. Desde 2017 nos a boga pa igualdad y inclusion cu ta balornan clave den un comunidad cu tin compasion pa nan prohimo.”

 

Minister Ursell Arends y Minister Geoffrey Wever a ricibi e manifesto di lidernan religioso dilanti bestuurskantoor y lo comparti esaki den conseho di minister. “E lo haya su debido atencion, igual na e atencion cu nos ta duna esnan cu un otro opinion,” Minister Arends ta termina bisando.