Dia 4 di October mundo ta celebra ta dia internacional di bestia. Departamento di Agricultura, Cria y Pesca, Santa Rosa tabata tin e grato placer di ricibi bishita di Sr. Ursell Arends, Minister encarga cu e cartera nan di Integridad, Naturalesa, Transporte y Cuido di nos Grandinan di cual Sector Primario ta resorta bao di su maneho.
Durante su bishita, e mandatario a ricibi un recorido door di e conocido “Cunucu Di Chabelito”, caminda cu e por a aprecia e diferente “mascotanan di Santa Rosa” cu tin presente y a ricibi informacion di e proposito di e kinderboerderij y informacion di cada uno di e bestianan.
E Minister a wordo ricibi door di Sra. Nathalie Maduro, Director pa e Departamento conhuntamente cu e demas colega nan di gerencia. Sra. Maduro na e mesun momento a splica referente e parti nobo di e kinderboerderij, cual ta e “Hofi di Chabelito”, den cual tin tur sorto di mata nan di fruta como tambe local. E meta di henter e seccion aki, ta pa stimula nos mucha nan ariba e importancia cu e Sector di Criansa tin pa Aruba su Sector Primario y con nan mester wordo cuida.
Segun un comunicado di prensa, di e forma aki Su Excelencia, Sr. Ursell Arends por a tuma conoce e seccion aki, ricibi mas informacion referente e tipo di bestia cu nos tin den e “Cunuco Chabelito” y combersa un rato cu e team di Santa Rosa cu tabata presente, ariba su vision y deseo nan pa cu e sector importante aki. Varios informacion y intercambio di idea pa un mihor bienestar di nos departamento a tuma lugar entre e mandatario y e Director kende a combersa tambe di nos Sector Primario en general aki na Aruba y su beneficio pa cu nos seguridad di cuminda.
Despues di e recorido den “Cunuco & Hofi di Chabelito”, Minister Arends a disfruta di un dushi Juice di Tamarijn fresco traha aki na Santa Rosa y for di e matanan di Santa Rosa mes.
Na nomber di nos Departamento di Agricultura, Cria y Pesca , conoci como Santa Rosa, nos ta gradici Minister Ursell Arends pa su bishita y deseando su persona, hopi exito den su funcion nobo na bienestar di nos Sector Primario y nos seguridad di cuminda.
