Aruba cu orguyo a sirbi como pais anfitrion pa e recien celebracion di Conferencia di Partido (COP) di Cartagena Convention, un tratado internacional significante dedica na proteccion y preservacion di bida marino den region di Caribe. E tratado aki cu a ser adopta na 1983 na Cartagena de Indias, Colombia, ta considera como un di e tratadonan clave pa e region maritimo desaroya bou di auspicion di Programa pa Medio Ambiente di Nacionnan Uni (UNEP).
E obhetivo principal di Cartagena Convention ta preveni, reduci y controla contaminacion ambiental marino den region di Caribe mientras ta promove desaroyo sostenibel mediante maneho responsabel di recurso natural.
E conferencia, cu a tuma luga for di 2 pa 6 di october 2023, a acoge representantenan di varios pais pa discuti esfuersonan colaborativo pa proteha y e uzo responsabel di nos lama Caribense. Minister Ursell Arends a expresa su orguyo den Aruba su rol como pais anfitrion pa e conferencia, colaborando cu e Ministerio di Landbouw, Natuur en Voedselkwaliteit di Hulanda den esaki.
Pa continua e cooperacion cu dicho Ministerio Hulanda, dia 5 di October, Minister Arends a firma un Memorandum di Entendimiento (MoU) hunto cu Minister Christianne van der Wal. E meta di e MoU ta pa reforsa colaboracion entre paisnan den Reino den area di recurso natural. E MoU aki ta desaroya riba tema di conservacion di naturalesa, siguridad di alimentacion, y cumplimento cu tratadonan internacional, fomentando colaboracion den Reino, permitiendo cada pais constituyente di cumpli cu nan obligacionnan cu tratadonan internacional.
Minister Arends ta extende un palabra di gradicimento na tur esnan cu a haci e conferencia aki exitoso. Un palabra di danki special na Directie Natuur en Milieu como e entidad gubernamental cu ta encarga cu e Convenio di Cartagena.
