Preparacionnan andando pa Luna di Adulto Mayor
Ministerio di Asuntonan di Adulto Mayor ta den pleno preparacionnan pa loke ta trata lansamento di Directie Ouderenzaken. E meta ta pa centralisa tur e esfuersonan cu tin pa mehora e variedad di retonan cu e grupo 60+ den comunidad ta enfrenta. Tambe lo percura pa subi e accesiblilidad na servicionan di cuido, stimula partipacion y bienestar di nos adultonan mayor.
Durante ultimo simannan a tene diferente reunionnan y a bishita diferente stakeholders pa presenta e maneho pa adultonan mayor. Minister Arends a elabora riba su vision cu ta dirigi riba optimalisa participacion den comunidad den un sentido amplio.
Diaranson 21 di september a bishita Fundashon Hospice Atardi y Stichting Thuiszorg Aruba (STA) unda a haya recorido di e instancianan y tambe splicacion riba e servicio cu cada un di nan ta ofrece. Hospice Atardi ta specialisa den palliatieve zorg, cual ta nifica cuido 24/7 pa personannan den nan ultimo fase di bida. Un caminda unda por alivia sufrimento, cu respet pa e huesped su privacidad y tambe pa famia por bishita. Cuido den ambiente di hogar. STA actualmente ta atendiendo cu 27 cliente y nan a demonstra di ta enfoka riba mehoracion continuo di e calidad di cuido cu nan ta ofrece na nos adultonan mayor.
“Unabes nos tin un familiar den un cas di cuido ta keda na nos como famia pa bishita nan, atende cu nan y sigui duna nan e amor y cariño cu nan merece”, Minister Ursell Arends ta expresa.
Durante reunion cu Organisacion di Penshonadonan Publico Arubano (OPPA), nan a trece diferente puntonan di preocupacion dilanti entre otro accesibilidad pa rolstoel, fondo pa actividad y control na casnan di cuido.
Minister Arends a informa cu actualmente tin un proyecto piloto andando den casnan di cuido pa sigura calidad di servicio. E proyecto aki a wordo presenta na e gruponan cu ta maneha e casnan di cuido dialuna 12 di september. Tambe tincu menciona cu tin combersacionnan andando cu Horacio Oduber Hospital (HOH) pa provee acceso na un ouderenarts pa casnan di cuido.
Pa loke ta trata fondo pa actividad, Gobierno di Aruba a inverti den e proyecto “Veilige Barios” pa aloca mas fondo na organisacionnan di bario pa asina por organisa mas actividad. Esaki ta inclui actividadnan pa nos adultonan mayor cual ta stimula participacion den un forma positivo.
Ta importante pa tende di nos adultonan mayor, nan pensamentonan y preocupacionnan y asina hunto cu stakeholders cu ta atende directamente cu nos adultonan mayor, por contribui na e maneho. Asina nos por ta sigur cu berdaderamente e maneho ta na nan bienestar.
