Minister Arends ta orguyoso pa extende felicitacion na henter e ekipo di Cas Marie pa nan trabou pa logra habri nan di dos localidad, Mama Ties. E energia, dedicacion, y amor cu nan a bin ta demostra pa nos adultonan mayor ta algo cu nos tur por ta orguyoso di dje.
Na September aña pasa, directiva di Cas Marie a presenta nan plan di expansion pa 2024. Un plan cu ta alinea cu e vision cu Ministerio tin pa nos adultonan mayor. E realidad ta cu e cantidad di hende cu demencia ta creciendo rapidamente aki na Aruba, pues no tabata tin duda cu mester a amplia capacidad pa por cumpli cu e demanda creciente.
Den menos cu un aña, e apertura a tuma luga den curason di Santa Cruz, celebrando hunto cu Famia Croes y Cas Marie, e logro significativo aki. Cas Marie ta un partner importante den e Proyecto di Pasadia, un proyecto principalmente pa adultonan mayor cu ta core riesgo di keda socialmente isola. Cu e apertura di Mama Ties, nos por orguyosamente bisa cu menos adulto mayor lo core e riesgo ey.
“Mi ta sigur cu awe ta un momento sumamente emocional pa Famia Croes, pa Cas Marie pero pa nos Ministerio tambe. Un logro cu tabata rekeri colaboracion di hopi man y curason nan. Curason pa crea un ambiente unda cada adulto mayor por sinti nan mes balora y aprecia,” Minister Arends a expresa durante su discurso.
E apertura di Cas Marie na Mama Ties ta un bunita proyecto cu sigur tin un significacion grandi pa henter famia Croes, kendenan a pone e hogar di nan mayornan disponibel pa sirbi un meta hopi importante pa nos pais.
Palabra di pabien na Cas Marie pa e gran paso aki cu ta un testamento di un futuro yena cu posibilidad y oportunidadnan positivo pa e bienestar di nos adultonan mayor. Minister Arends a conclui reafirmando su confiansa, cu basa riba e dedicacion cu nos a bin ta mira pa cas di Mama Ties, Aruba lo logra hopi mas pa nos adultonan mayor.
